Graduadu FSS Agradese UNTL

DILI, (ANTIL) – Estudante graduadu Fakuldade Siénsia Sosiál (FSS), Universidade Nasionál Timor Lorosa’e (UNTL) agradese ensinu superiór, UNTL tanba, instituisaun akadémika ne’e nu’udar espasu atu aprende no estuda hodi projeta sivilizasaun umana no preparasaun rekursu ne’ebé kualifikadu ba prosesu konstrusaun estadu Timor-Leste.

“Ami hanoin katak laiha liafuan ida natoon ba ami hodi manifesta kontente no agradese ne’ebé ami iha ba UNTL, ne’e duni ami bele hato’o de’it liafuan simples, obrigadu no kontinua nafatin”, agradese reprezentante graduadu, Dionísio de Araújo iha yudisium dasanolu resin ne’e iha Kampus FSS, Kaikoli, Dili, Sesta (18/11).

Agradese kle’an tebes ba FSS ne’ebé mak forma no orienta ona ami hodi dezenvolve ami-nia kapasidade umana ho siénsia no esperiénsia lubun durante ami hakat iha prosesu aprendijazen.

Konsiente katak susesu ne’ebé hetan ona ne’e la’ós produtu finál maibé fiar no optimista katak produtu husi fakuldade ida ne’e prontu no kualifikadu ba merkadu traballu hodi serbi ba família, ba estadu no ba mundu.

“Obrigadu no agradese tebes ba sívita akadémika, hahú husi reitór, dekanu, dosente, funsionáriu, estudante, seguransa no responsável limpeza sira hotu,” agradese tan reprezentante graduadu sira husi Departamentu Komunikasaun Sosiál ne’e.

Nia hatutan, sira kongratula no agradese ba servisu, dedikasaun morál, prontidaun no tempu ne’ebé sívita akadémika sira fó ona hodi sira bele hakat iha prosesu aprende no dezenvolvimentu matenek umana ninian.

“Ami konsiente katak susesu ne’ebé ami hetan envolve mós imi hotu nia partisipasaun. Sentimentu domin, fraternizasaun no amigavel ne’ebé mak ita hotu kria ona iha fatin ida ne’e, labele ikus iha espasu ida de’it maibé ami enkoraja no propoen atu kontinua no la iha nia rohan,” kongratula graduadu ne’e hodi kontinua sujere.

Atu konklui, reprezentante graduadu, Dionísio de Araújo ne’e manifesta mós nia agradesimentu ba inan-aman sira tanba inan-aman sira fó ona domin, dedikasaun, akompañamentu, korajen, vontade pozitiva hodi bele finaliza estudu no objetivu ne’ebé mak sira mehi ona.

Tema ba atividade yudisium ba estudante graduadu Fakuldade Siénsia Sosiál-UNTL, 2016 ba departamentu Administrasaun Públika, Dezenvolvimentu Komunitáriu, Komunikasaun Sosiál,  Polítika Públika, Relasaun Internasionál no Siénsia Governamentál mak “Mai ho Dignidade, Fila ho Dignidade”. (jornalista: Rafy Belo; editora: Rita Almeida)