KOMBATE PESKA ILEGAL…!!! - opiniaun

Jornal Nacional, editorial

Timor Leste ukun rasik an tinan 14 ona maibe too ohin loron seidauk resolve problema peska ilegal iha tasi timor hodi naok ikan. Kada tinan Timor Leste lakon 200 milloes dollar Amerikano.

Peska ilegas ne’e laos foin mosu, ka primeira vez akontese maibe peska ilegal sira nee naok ikan timor nian tinan barak ona nebe governu too ohin loron seidauk iha solusaun ba hapara aktividade ilegal nee.

Agora fasil ka kontrola peska ilega sira nee? klaru laos fasil. Peskador sira nee iha maneira rasik atu oinsa ses husi kontrola  seguransa maritima nian. Pior liu tan Timor Leste, li-liu seguransa polisia maritima no F-FDTL komponente Naval laiha ekipamentu adekuadu hodi kontrola soberania tasi timor nian.

“Ministru Estadu Asuntus Koordenador Ekonomia no Ministru Agrikultura no Peskas, Estanislau Aleixo da Silva, kontaktu direitamente ba Ministeriu Defeza ho Seguransa atu mobiliza malu ba Kosta Sul para observa situasaun peskas illegal iha fatin neba,” Acacio Guterres.

Los duni senhor, Ministeriu rua nee mak iha responsabilidade atu halo kontrola, li-liu Polisia Maritima no Komponente Naval atu fo seguransa riku soin timor nian, li-liu oinsa atu bele hapara aktividade ilegal iha Kosta Sul.

Agora kestaun mak Ministeriu rua nee haruka forsa Naval ho Maritima ba nee, iha ona ekipamentu ka seidauk, ro nebe bele infrenta ondas tasi ka lae?  governu tenki fasilita Naval ho Maritima hodi bele ba halo seguransa hodi asegura riku soin timor nian nee.

Estadu, iha parte nee governu tenki investe makaas liu tan iha area seguransa no defesa, polisia maritima no Komponente Naval – F-FDTL atu sira bele iha kapasidade kontrola parte tasi ninian.

Laiha duvida katak komponente Naval iha ro no maritima mos iha ro maibe ro sira nebe forsa seguransa no defesa iha nee la agueta tasi parte Kosta Sul tan nee, ro nebe governu china fo no ro balu nebe governu timor sosa la bele infrenta tasi ondas nebe boot.

Tan nee atu hapara aktividade ilegal nee no Timor Leste atu labele tinan tinan lakon miloens ba milloens dollar amerikano mak governu obrigado tenki soso ro foun ho pasidade boot no tahan ondas tasi mane nian atu bele ba fo seguransa iha neba.

Atu evita paska ilegal, governu mos tenki hanoin oinsa loke konkursu ba peskador sira atu halao peska ba ikan sira iha Konsta Sul atu nunee bele selu taxa ba estadu. Ho investementu area peska sira hanesan nee maneira ida atu bele minimiza peska ilegal.

Dadus nebe Ministeriu Agrikutura aprezenta kada tinan Timor Leste lakon 200 milloes dollar nee laos osan oituan. Tan nee governu tenki halo ona investementu atu kontrola aktividade ilegal sira iha Kosta Sul,  li-liu peska Ilegal.

Governu la halo investementu hodi asegura riku soin sira nee agora bainhira tan? se laos ita se tan?. Ne’ebe governu tenki iha kometimentu forte hodi aseguransa soberani tasi timor, riku soin iha tasi timor ho nia kontiudu tomak.*