Emilia Laiha Nasionalismu Ba TL, Responsavel MP, Jose No Coment

DILI - Nudar eis membru governu tuir los Emilia Pires tenke hatudu nasionalismu no patriotismu ba nasaun nee, maibe hahalok arguida nian neebe ses an husi justisa hanesan ejemplu neebe ladiak no ema neebe laiha nasionalismu no patriotismu ba nia rai rasik.

Tuir Prokurador Jeral da Republika Jose Ximenes hatete, arguida Emilia Pires nudar eis membru governu iha nasaun ida nee. Tuir los nia tenke koopera diak ho justisa neebe lao iha nasaun ida nee, loas sai tiha ba nasaun seluk mak husu atu julga fali nia kazu iha neeba. Hahalok ida nee hanesan ema neebe laiha nasionalismu no patriotismu ba nia rai rasik.

Tribunal julga ema Timor atus ba atus ona, laos foin Emilia. Neebe tribunal sei lao nafatin ho prosesu neebe mak iha,” dehan nia ba jornalista iha Otel Timor, Colmera, Kuarta (23/11/2016).

Iha parte seluk bainhira husu kona ba responsavel Ministeriu Publiku nian ba arguida Emilia Pires neebe mak oras nee hases an husi justisa, tanba MP no tribunal mak autoriza arguida sai ba liur, PGR nee lakohi koalia hodi dehan “hau laiha komentariu,”.

Antes nee fontes konfirmadu iha tribunal hatete, bainhira tribunal simu ona pedidu ruma mak foin bele foti desizaun. Maibe kazu Emilia Pires nian akontese iha TL laos iha Portugal, neebe julgamentu tenke halo iha nee laos iha Portugal. Sekuandu hanoin hanesan nee, antes nee koalia ka halo pedidu para labele halo julgamentu iha nee. Agora atu tama ona ba desizaun mak foin husu atu halo fali julgamentu iha Portugal. Informasaun kompletu iha STL Jornal no STL Web, edisaun Kinta (24/11/2016). Domingas Gomes/Domingos Piedade

Suara Timor Lorosae