Advogadu Emilia: Laiha Posibilidade Julga iha Portugal

DILI: Advogadu privadu arguida Emilia Pires, José Camoes hatete, laiha posibilidade atu transfere julgamentu ba kazu ne’ebé ninia kliente komete ba tribunal iha Portugal.

“Laiha posibilidade, kada ema, individu, husu diretamente ba tribunal (Timor-Leste) hodi lori prosesu ba Portugal. Lei Portugal mó la dehan hanesan ne’e,” deklara Advogadu José ba olatimornews.com iha Tribunal Distrital Dili, Kinta (01/12).

Kona-ba informasaun husi ninia kliente, advogadu ne’e dehan, to’o agora arguida Emilia la kontaktu ona nia hodi hato’o informasaun ruma kona-ba ninia kondisaun iha Portugal.

“To’o agora ne’e, laiha informasaun ruma to’o iha ha’u-nia liman,” hatete advogadu privadu ne’e.

Kona-ba pedidu arguida ba Ministériu Públiku foin lalais ne’e, José dehan, pedidu ne’e arguida husu direitamente, la liu husi advogadu.

Entretantu, maske ninia kliente konsidera administrasaun Tribunal Timor la’o la di’ak, maibé advogadu ne’e fiar nafatin Tribunal atu foti desizaun ne’ebé di’ak ba arguida Emilia bazei ba faktus ne’ebé oras ne’e Tribunal iha.

“Ita hotu fiar (tribunal sei) foti desizaun tuir faktus no provas ne’ebé mak dokumentada ona iha Tribunal ne’e,” hatete advogadu ne’e.

Nia husu ba Tribunal atu labele foti desizaun sees fali husi faktus no haree fali ba kestaun seluk.

Defeza sei kontente, sei hein desizaun di’ak ba arguida nian,” dehan José. (*)

Aquino Campos – Ola Timor - Editór: Tellukoro

Foto: Advogadu Arguida Emilia Pires, Jose Camoes fahe informasaun ba jornalista sira. (olatimornews FOTO: Aquino Campos)

Lee liu iha Ola Timor

Arguida Emilia dehan Nia Portugueza, Julga iha Portugal

Tribunal Hasai Orden Kaer Emilia Pires