Vise ME: Di’ak Liu Eskola iha Timor Duke ba Indonezia

DILI: Vise Ministru Edukasaun Abel Ximenes husu ba estudante sira ne’ebé akaba ona estudu iha nivel Sekundaria atu di’ak liu kontinua sira nia estudu iha Timor-Leste duke ba Indonezia.

Vise Ministru fó razaun katak, lian sai hanesan difikuldade boot ba estudante sira, nune’e bainhira remata estudu no fila fali mai Timor-Leste sira sei la hetan susesu.

“Timor-oan ba Indonezia sira fila fali mai iha Timor-Leste tenke halo adaptasaun ne’ebé mak boot tebtebes. Primeiru, sira tenke aprende fila fali lian Portugues, depois aprende lian English”, dehan Vise Ministru Abel ba jornalista hafoin partisipa seremonia tomada posse ba membru Kooperativa Eskolar iha Eskola Kristal, Dili, Kinta (15/12).

Aleinde lian, Vise Ministru ne’e dehan, kurrikulu iha Indonezia diferente ho TL, tan ne’e iha area barak, hanesan edukasaun no direitu maske hetan ona lisensiatura, maibé susar atu uza bainhira fila fali mai TL.

“Maibé area balun ke di’ak, hanesan  area teknika. Ita Timor ne’e parese seidauk iha ou kualidade laboratoriu ba professor seidauk di’ak, entaun tenke ba fali iha Australia, tanba iha Australia ne’e baratu liu. Mais area barak, di’ak liu ita eskola iha Timor”, dehan Abel. (*)

Pachar Malay – Ola Timor - Editór: Tellukoro

Foto: Vise Ministru Edukasaun Abel Ximenes hetana intervista husi jornalista sira hafoin partisipa iha seremonia tomada posse ba membru Kooperativa Eskolar iha Eskola Kristal, Dili, Kinta (15/12). (olatimornews FOTO: Pachar Malay)