PNTL Baku F-FDTL Ne’e Komportamentu Individuál

DILI, (ANTIL) – Ministru Interior, Longuinhos Monteiro informa, membru Polísia Nasionál Timor-Leste (PNTL) baku membru FALINTIL-Forsa Defeza Timor-Leste (F-FDTL) ne’e komportamentu individuál, la’os reprezenta instituisaun.

Longuinhos hato’o kestaun ne’e ba jornalista sira iha Palásiu Prezidénsia Repúblika, Bairu-Pité, Dili, Kuarta (24/8), hafoin ramata inkontru ho Prezidenti Repúblika, Taur Matan Ruak.

Kestaun ida ne’e, nia haktuir, Prezidenti Repúblika mós levanta iha inkontru laran no sujere atu rezolve lalais problema refere.

Longuinhos dehan, Komandante PNTL no F-FDTL maka tenki rigorozu liu-tan foti desizaun ba membru sira ne’ebé komete krime infrasoens. “Orsida kedas ha’u sei bolu Komandante Jerál PNTL”, nia tenik.

Tanbasá kazu ne’e akontese, eis Komandante Jerál PNTL afirma, ne’e vítima ho suspeitu maka tenki hatán sira nia kazu tanba nia lá reprezenta komportamentu membru forsa no defeza hirak ne’e iha públiku.

Antes ne’e, Majór Jenerál Lere Anan Timur hatete membru PNTL baku membru F-FDTL ne’e hamutuk dala 20 ona. Nia rasik konfuzaun tanbasá hahalok ida ne’e tenki monu ba ninia membru sira. (jornalista: Xisto Freitas; editora: Rita Almeida)

Foto: Ministru Interior, Longuinhos Monteiro halo intervista ho jornalista sira iha Palasiu Prezidensial, Kuarta, (24/8). Foto ANTIL