TAUR KONGRATULA LU-OLO, XANANA FATOR DETERMINANTE

Prezidenti Republika (PR), Taur Matan Ruak, kongratula no hato’o votus parabens ba PR eleitu ba periodu 2017-2022, Francisco Guterres ‘Lu-Olo’.

Ba jornalista sira iha salaun Delta Nova, Kuarta (22/3/2017), PR Taur Matan Ruak mos hatoo nia ksolok parabens ba povu tomak, inklui mos kandidatu Prezidenti Republika nain 8 ne’ebe kumpri diak tebes regras hotu-hotu husi Comissão Nacional da Eleições (CNE).

“Ha’u mos fo parabens ba povu sira no mos kandidatu nain 8 ne’ebe konkore, inklui ita nia Ministru Edukasaun, Antonio da Conceição “Kalohan”,”  hateten PR Taur.

Ba partisipasaun povu ne’ebe la masimu iha eleisaun PR ne’e, Taur hateten, Timor Leste foin hahu, mais tenke hadia, para labele to’o loron besik eleisaun ona mak husu povu nia apoiu.

Xanana fator determinante

Husi sorin seluk, akademista husi Universidade Nacional Timor Lorosae (UNTL), Valentim  Ximenes, konsidera katak, eleisaun ne’e la’os kompetisaun entre jerasaun tuan ho foun, maibe kompetisaun entre sidadaun sira ne’ebe responsavel no responde ba kriteria kandidatura nian.

“Se mak manan no se mak lakon depende ba povu, povu ba vota la’os haree fali ba jerasaun, mas haree ba ema ninia kapasidade hodi lidera Estado,” hateten Valetim Ximenes hodi responde JNDiario iha Dili.

Importante ba oin, tuir Valentim Ximenes, Prezidente Republika hakuak ema hotu hodi tama iha konstrusaun nasaun, tanba ne’e, hanoin ida katak, kompetisaun entre jerasaun tuan ho foun ne’e la dun diak.

Eis Vise Ministru ESTATAL iha Primeiru Governu Konstitusional ne’e konsidera katak, vitoria Lu-Olo nian absoluta no lejitimu iha primeira ronde.

“Lu Olo manan tanba hetan apoiu mos mai husi partidus sira seluk hanesan, partido boot CNRT,  ASDT, UNDERTIM no Partido Esperansa da Patria (PEP), mais importante liu maka hetan influensia maka’as husi lider karismatiku Kayrala Xanana Gusmão, nudar lider nasional no lider partidu CNRT,” afirma Valentim Ximenes.

Valentim haklaken mos katak, wainhira Xanana hamrik ona iha kandidatu ruma nia soin lori duni esperansa. Tanba realidade, wainhira Xanana hamrik iha Ramos Horta konsege manan no hamrik fali iha Taur Matan Ruak nia soin mos manan iha eleisaun presidensial.

“Periodu ne’e Xanana halo ba Lu-Olo nudar jerasaun estadista nasaun nian atu aseugra Estadu Direitu no Demokratiku,” hateten Valentim.

Valentim Ximenes hato’o parabens ba Prezidente Republika eleitu, Francisco Guterres ‘Lu Olo’ ne’ebe mak hetan ona fiar tomak husi povu.

“Hau hakarak hato’o parabens no ba votantes sira hotu ne’ebe maka ho konsiensia, bontade hodi tuir vota, maske la dun fo importansia ba sira. Prezidente eleito mai ho ninia lema ida katak, prezidente republika ba povu tomak, maske nia mai husi partido FRETILIN,” dehan Valentim. eus/mia

Jornal Nacional Diário