Feto Presiza Promove Aan Iha Area Muzika-Desportu

DILI-Governu liu husi Sekretariu Estadu Joventude e Desportu (SEJD), presiza promove inan feton sira iha atividade muzika no area desportu ninia.

Kestaun nee fo sai husi Rosalino Mendes, hanesan dosente husi UNPAZ, husu ba governu liu husi SEJD presiza dezenvolve ou promove nafatin alin feto sira, liu-liu iha area muzika no area desportu ninia, tanba too agora feto ninia partisipasaun iha area rua nee seidauk masimu diak, tanba nee, oinsa mak liu husi SEJD atu bele fo kapasitasaun ba feto sira iha area rua refere.

Hau hanoin area rua nee importante teb-tebes ita atu dezenvolve ba oin, maibe ida nee depende ba ita nian governu, tanba ita haree ita nia arista Timor oan nee mos feto iha, maibe too agora seidauk sufsiente, entaun oinsa mak ba oinitaatudezenvolve feto sira nian partisipasaun iha area muzika no area desportu,” dehan Rosalino ba STL hafoin partisipa iha seremonia aniversariu DIT ba dala 15 iha knua DIT Aimutin, Dili Kuarta (10/05/2017).

Rosalino akresenta, husu ba governu presiza fo promove feto sira iha area muzika no desportu ninia, bainhira feto sira iha koinesementu ba area rua nee, sira bele kria rasik inisiativa ida iha sira nia Munisipiu ou postu administrative, ezemplu atividade desportu, bainhira iha atividade ruma halao iha suku, sira bele organiza malu, nomos area muzika ninia mos hanesan.

Nia hatete, dala barak haree iha capital Dili nee feto ninia partisipasaun iha area rua nee sei iha uituan, maibe sira neebe mak hela iha Munisipiu sira nee, ladun partisipa diak iha atividade sira hanesan nee, entaun husi SEJD mak presiza iha politika ida nee, hodi bele toma atensaun mos ba feto sira neebe mak hela iha area rurais, ho nunee sira mos bele partisipa iha atividade desportu iha sira Munisipiu. Jacinta Sequeira

Suara Timor Lorosae