Lu-Olo: Hau Kontra Korupsaun

DILI - Korupsaun hanesan firus aat ida, firus nee, sirkula ona iha rai laran hodi fo impaktu ladiak ba povu nia moris, halo povu kontinua moris iha situasaun kiak no mukit nia laran. Tanba nee Prezidente Eleitu kompromete sei kombate.

Tuir Prezidente Eleitu, Francisco Guteres “Lu-Olo” katak, hanesan prezidente eleitu kontra korupsaun, tanba korupsaun ladiak no estraga povu nia moris halo povu moris iha kiak no mukit nia laran.

Korupsaun nee uluk kedas ema hotu kontra ate hau mos kontra ida nee (korupsaun),” dehan Prezidente Eleitu, Francisco ba jornalista sira hafoin remata misa agradesementu prezidente eleitu, neebe halao iha igreza Katedral-Dili, Kinta (18/05/2017).

Prezidente Eleitu haktuir, kualker se deit mak ba kaer ukun tenke uza riku soin povu nian ho didiak, uza hadia povu nia moris liu husi dalan dezenvolvimentu, maibe labele uza riku soin povu nian ba interese grupu ida nian deit.

Iha fatin hanesan, Bispu Diocese Maliana, Dom Norberto Amaral, SDB hatete, oras nee korupsaun sai problema boot ba sosiedade, ida nee hodi afeita ba dezenvolvimentu nasional liu-liu iha area infra estrutura halo estrada sira laiha kualidade. Raimundo S. Fraga

Suara Timor Lorosae