Parpol Hahu Aprezenta Lista Kandidatura

DILI - Antes tama ba loron elpar, Comisaun Nasional Eleisaun (CNE) husu ba parpol sira mak compete, tenke aprezenta lista kandidatura ba CNE. Tuir Sekretariu Ezekutivu CNE, Bernardo Cardoso, aprezentasaun lista kandidatura importante tebes ba parpol sira. I tuir data eleisaun neebe Prezidenti da Republika promulga ona, komesa ohin, ida-idak parpol hahu aprezenta sira nia kandidatura ba CNE.

Hahu aban (ohin) parpol sira hahu aprezenta ona lista kandidatura ba CNE,” hateten Bernardo Cardoso iha aprezentasaun material iha Salaun Laline-Larigutu, CNE, Caicoli-Dili, Kuarta (3/5/2017).

Aprezentasaun kandidatura ba CNE durante 30 dias, hahu dia 4 Maiu too 2 Junhu 2017. Prosesu aprezentasaun lista kandidatura mai husi partidu nomos koligasaun.

Iha fatin hanesan, Koordenador Partidu CNRT Munisipiu Dili, Luis Ximenes Caldero dehan, prezidente promulga tiha ona data eleisaun nian neebe nudar partidu politik liliu CNRT preparadu no iha kualker tempu aprezenta lista kandidatura. Nunee mos PSD. Sekretariu Jeral PSD, Reinaldo Borges dehan, lista kandidatura PSD nian preparadu.

Estrtutura prontu atu halo lista ida, hau hanoin orsida lokraik, ami halo enkontru nee para bele buka malu ona iha semana nee nia laran halibur husi munisipiu hothotu para bele organiza-an,” esplika Reinaldo.

Entertantu, Prezidente Interino PUDD, Julio Salsinha dehan, Partidu Unidade Dezenvolvimentu Demokratiku (PUDD) prontu ona atu aprezenta lista kandidatura ba CNE.

Ami prepara no lista sira nee prontu hotu ona, bainhira mak CNE fo orientasaun ami prontu hatama, antes nee ami prontu tiha ona tanba ami iha orgaun profisional partidu neebe halibur kaum intelektual Timor oan sira neebe mak iha rai laran,” tenik Julio.

Vise Prezidente MLPM, Ivo da Costa Soares dehan, antes nee husi partidu MPLP prepara hotu tiha ona lista kandidatura husi munisipiu 12 inklui RAEOA, hein atu aprezenta ba CNE. Raimundo S. Fraga

Suara Timor Lorosae