Istória Partensia Orgullu Sidadaun Sira Nian

DILI, (TATOLI) - Ema ida-idak iha nia istória rasik ba prosesu luta libertasaun pátria hanesan istória asua’in sira-nia ne’ebé povu Timor-Leste sei lahaluha maibé iha mós istória husi povu baibain ne’ebé akontese durante períodu naruk luta ba libertasaun nasionál.

Ho nune’e Sala de Leitura Xanana Gusmão sei organiza espozisaun “Memória 99” hodi selebra loron konsulta populár iha fulan-Agostu liuhusi kolleta istória ema baibain ne’ebé akontese iha tinan 1999 liubá.

Feira ba “Mémoria 99” hodi fó hanoin filafali kona-ba lembransa ema ida-idak nian iha moris atu hateke ba kotuk fali  no hatudu istória pesoál sira ne’ebé mak úniku no signifikadu tebes ba ema ida-idak iha tinan ne’ebá.

Antes atu tama ba espozisaun Xanana Gusmão Reading Room husu timoroan sira atubele oferese volutariamente sira-nia istória pesoál iha forma fotografia liuhusi objetu ruma ka fatin sira ne’ebé iha signifikadu ne’ebé sei hatudu iha selebrasaun loron konsulta populár.

Tanba espozisaun ida ne’e atu fó omenajen, la’ós ba eroi de’it fó mós omenajen ba povu baibain sira ne’ebé terus ba funu libertasaun nasionál.

Tanba ne’e Sala de Leitura Xanana Gusmão hakarak konvida ema sira ne’e mai fahe ninia istória tanbasá sira rai nafatin memória ida ne’e, signifika saida ba sira.

Kona-bá fahe istória 99 nian, Jestor Sala de Leitura Xanana Gusmão, Gaspar husu atu ema barak bele fahe sira-nia istória tanba istoria konsidera hanesan eransa ida hodi kompleta istória eroi sira-nian.

“Kolleta istória ne’e tanba orgullu nu’udar sidadaun independente iha rai ida ne’e nian. Ami laiha mehi aas liu maibé mehi ida mak ema bele konsidera istória sira ne’e no karik istória ruma mak ema lakonsege ba kolleta sira bele buka fali liuhusi ema hirak ne’e, entaun ami koko atu dada ema sira ne’e mai.”

Espozisaun ne’e sei halo posivelmente semana rua antes tama ba loron 30 fulan-Agostu to’o 4 Setembru 2017 no tempu atu kolleta istória sira ne’e hahú iha fin fulan-Maiu no sei kontinua to’o inísu Agostu no sei realiza feira ne’e iha Lesidere.

Maski daudaun ne’e ema seidauk barak mak fahe istória maibé Xanana Reading Room iha kompromisu atu kolleta istória liuhusi formulária ne’ebé oferese ba timoroan ne’ebé hakarak konta sira-nia istória.

Hafoin istória ne’e kolleta hotu tanba baibain fatin ne’e organiza vizita estudante primária sira nomós iha diskusaun joven sira no iha espasu ba sira atu fahe istória no espasu seluk ne’ebé sira aproveita hodi hatene istória ema seluk nian.

Jornalista: Maria Auxiliadora | Editór: Manuel Pinto

Foto: Jestór Xanana Gusmão Reading Room, Gaspar Q. Freitas (timoroan) hasai foto hamutuk ho ekipa Xanana Reading Room. Foto/Facebook.