RENETIL Presta Omenajen Ikus Ba Saudozu Mauboro

DILI - Organizasaun Resistensia Nacional dos Estudantes Timor Leste (RENETIL) presta omenajen ikus ba saudozu Antonio Maria Soares Mauboro, neebe hakotu iis iha Hospital Singapura.

Saudozu Mauboro too iha Airoportu Internasional, Nicolau Lobato-Dili iha tuku 4 ho balun, ho aviaun Silk Air. Simu ho parade militar, taka ho bandeira RENETIL inklui bandeira Nasional, depois transporta kedan mai iha sede RENETIL.

Tuir Prezidente RENETIL, Jose A. M. X hatete katak, ita halibur malu hamutuk iha sede RENETIL nian hodi fo presta omenajen ikus ba kompaineiru Mauboro tanba fo ona nia kontribuisaun ba RENETIL.

"Biban ba dala ikus, ita halibur malu iha nee, iha knua neebe kompaineiru Mauboro kontribui ba prosesu luta ba RENETIL nian,” dehan Jose liu husi lia dadolin iha sede RENETIL, Farol-Dili, Sabadu (08/07/2017).

Jose haktuir, maske kompaineiru Mauboro fila ona ba mundu seluk, maibe nia espiritu lamate hamutuk nafatin ho ita harohan ba aman maromak atu fo fatin diak ba nia iha reinu lalehan nian.

Iha fatin hanesan, Diretor Ezekutivu Asosiasaun HAK, Manuel Monteiro dehan, saudozu Mauboro durante nee fo ona ninia kontribuisaun barak ba rai ida nee. Manuel afirma, Mauboro ema ida neebe mak brani tebes, iha momentu krize 2006, nia konsege salva familia kbiit laek sira liliu salva Maijor Koliate ninia familia iha situasaun ameasa nia laran,

Tuir Observasaun STL iha tereinu nota katak wainhira mate isin too saudozu Mauboro too iha Airoportu Internasional, Nicolau Lobato-Dili, familia, kolega sira akompania too iha sede RENETIL no kontinua kedas ba nia rai moris fatin Likisa. Raimundo S. Fraga

Suara Timor Lorosae