PLP Pozisaun Firme Halakon Pensaun Vitalisia

DILI -Tuir pontu devista Partidu Libertasaun Popular (PLP) nian, populasaun Timor Leste maioria hela iha area rural moris nudar vida agrikultor ita bele dehan 70 ka 80%.

Tuir Reprezentante Partidu PLP, Jose Belo Marçal katak, lei pensaun vitalisia nee ladun iha justisa ba povu Timor Leste, tanba nee komitmentu PLP halakon lei nee.

Agora dadauk PLP nafatin firme ho ninia pozisaun halakon pensaun vitalisia, seidauk tempu para introduz ida nee,” dehan Jose hatan perguntas jornalista STL nian konaba sira nia pozisaun ba lei pensaun vitalisia, iha studiu GMN TV, Mandarin-Dili, sabadu (08/07/2017).

Reprezentante PLP nee hatutan, justisa ladun iha tanba haree ema neebe mak ukun tinan 5 nia bele iha direitu ba 100% ba ninia salariu tomak. Jose salenta, labele eduka sosiedade, laservisu hetan nafatin vensimentu, nee ladun edukativu mos, hakarak ema ka joven neebe mak ho idade produtivu tenke enkoraja nia servisu mak bele simu.

Iha fatin hanesan, Sekretariu Jeral Partidu Uniaun Demokratika Timorense (UDT), Abono Rankabian esplika, pozisaun UDT nian lakontra pensaun vitalisia maibe tenke iha regulamentu. Sekretariu Jeral UDT afirma, wainhira hanesan deputadu ida kuandu sai husi parlamentu atinji 65 anos, nia iha direitu klain atu hetan pensaun vitalisia atu hatutan nia moris maibe labele fo 100%.

Entertantu, Adjuntu Sekretariu Jeral Partidu PDC, Geraldo Sarmento Ximenes dehan, pozisaun partidu PDC nian kontra konaba lei pensaun vitalisia nee tanba lei nee lafo benefisiu ba povu. Raimundo S. Fraga

Suara Timor Lorosae