TL Hasoru Problema Kompleksu

DILI, (TATOLI) - Organizasaun Naun Governamentál (ONG), La´o Hamutuk observa katak, Timor-Leste (TL) iha parte investimentu ba area hanesan, edukasaun, turizmu, indústria nomós naun petróliferu, sei enfrenta problema barak.

Peskizadór La´o Hamutuk, Juvinal Dias, esplika edukasaun nia problema rekursu sei limitadu, sistema edukasaun fraku tanba kontribui hosi alokasaun Orsamentu kada tinan ne’ebé minimu teb-tebes.

“Pontu importante tolu ne´e, povu presiza husu ba partidu sira kona-bá planu  oinsa atu sustenta finansa estadu bainhira rendimentu estadu husi petróleu la iha ona,” Juvinal Dias ba Ajénsia TATOLI, iha fim-de-semana ne´e, iha nia kna´ar fatin La´o Hamutuk, Bebora.

Juvinal enkoraza povu hodi konsentra hanoin iha pontu importante ne’ebé nia mensiona hodi hetan esplikasaun klaru nune’e bainhira hakat ba sentru votasaun iha loron 22 Jullu la bele hili sala partidu atu ka’er ukun iha periode 2017-2022.

Husu polítika saida mak ukun na´in sira iha hodi bele investe liutan ba setór edukasaun, turizmu, indústria nomós naun petróliferu inklui planu oinsa hadi´a sistema ba asesu edukasaun, saúde, saneamentu no bee moos ba ema hotu.

“Pontu importante hirak ne´e hodi fó hanoin ba povu Timor-Leste hodi husu ba partidu polítiku sira dalan saida mak partidu sira sei foti no asegura katak Timor-Leste nia ekonomia nafatin sustenta ba futuru,” Juvinal fó hanoin.

Hodi dehan, partidu barak ohin loron koalia kona-bá subsidio, buat ne’ebé presiza povu kestiona mak meius saida mak partidu sira iha hodi evita fakar osan arbiru?

Entertantu nia afirma fila fali katak, iha mundu nasaun sira ne´ebé konsege dezenvolve sira-nia sistema edukasaun di´ak ne´e tanba sira gasta 30 pursentu orsamentu estadu ba iha setór edukasaun no saúde. Infelizmente Timor ida ne’e la akontese hetok iha mak dezafiu kona-ba sistema ba asesu edukasaun, saúde, saneamentu, bee moos ba ema hotu maske iha ona progresu balun.

Atu konklui, nu’udar sidadaun, nia espera katak iha sétimu governu konstitusionál ne’e bele investe maka’as liutan ba setór naun-petroliferu sira.

Informasaun relevante, asesu iha: http://laohamutuk.blogspot.com/2017/07/informasaun-kona-ba-eleisaun.html

Entretantu, kona-ba partidu polítiku, klik iha link ne´e: http://www.tatoli.tl/2017/06/parpol-asina-paktu-unidade-hodi-hametin-paz-iha-kampana-elpar/

Jornalista: Rafy Belo | Editór: Manuel Pinto

Foto: Peskizadór La´o Hamutuk, Juvinal Dias. Foto espesiál