Canossa Sai Vensedór ba Konkursu Puízia

DILI, (TATOLI) – Eskola Sekundária Santa Madalena de Canossa sai vensedór literatura liliu poema ne’ebé organiza husi Arkivu no Múzeu Rezisténsia Timor-Leste (AMRT) hodi komemora tinan 18 konsulta populár 30 agostu ne’ebé partisipa husi eskola sekundária públika no privada iha Kapitál Dili.

Reprezentante eskola Canossa, Ana Monica do Rego hateten nia apresia tebes ho desizaun juri hodi sai primeiru-lugar entre reprezentante sira husi eskola seluk.

“Liuhusi konkursu ida ne’e, ha’u bele aprezenta ha’u-nia talentu ne’ebé hetan ona durante aprendizajen eskola nian, liliu iha matéria literatura”, hateten Ana Monica do Rego ba jornalista sira hafoin anunsiu rezultadu husi ekipa juri iha salaun AMRT Dili, ohin.

Nia reforsa, primeiru lugar sai hanesan motivasaun ida nune’e mós ba ema seluk. “Ba maluk sira ne’ebé mak iha talentu ne’ebé mak subar hela atu iha motivasaun atu tuir konkursu sira atu nune’e halo ita-nia nasaun forsa liutan ho matenek na’in sira iha rai ne’e”, katak.

Hatan ba ajénsia Tatoli kona-ba oinsa promove literatura, nia responde sei halo literature hanesan puízia no seluk tan sai moris liutan ho buat ne’ebé identiku tuir nia poténsia no abilidade.

“Ha’u hakarak ho ha’u-nia aan rasik no hakarak hatudu ba mundu katak matéria literatura di’ak tebes tan ita bele hasai ita-nia sentimentu”, espresa.

Ana Monica do Rego haktuir hahú gosta literatur iha 2012, puízia no hakarek sira ne’ebé mak sai nia inspirasaun mak obra husi eskritora timoroan ida, Alexandra Tilman, dosente ida mós iha Universidade Nasionál Timor Lorosa’e (UNTL).

Nia laran monu no hadomi literatura tan hakarak duni hasai sentimentu maibé forsa mak seidauk iha.

“Agora mak ha’u hatene loloos katak ha’u-nia forsa no ha’u-nia talent mak ida ne’e duni”, akresenta ho orgullu.

Júri ida ba konkursu ne’ebé AMRT organiza, Abe Barreto Soares fó hanoin ba konkorente no manan na’in ba konkursu ne’e katak talentu ne’ebé iha tenke promove nafatin no labele iha kompetisaun de’it. “Autokonfiansa tenke makaas nafatin, prémiu ne’e bonus de’it”, enkoraja.

Entretantu manan ba konkursu poema ne’e mak, primeiru lugar monu ba Ana Monica do Rego husi eskola Canossa ho valór 1164, Segundo lugar monu ba Defitri Freitas husi eskola São Pedro ho valór 1063, terseiru lugar monu ba Brígida de Jesus husi eskola Paulo VI.

Tuir mai, quarto lugar monu ba Sónia Soares Freitas ho valór 1025 husi eskola 12 Novembro, quinto lugar monu ba Natália Eva da Cruz husi eskola 12 Novembro ho valór 1107 no ikus liu mak Mário Rivaldo husi eskola São Pedro nu’udar mane úniku ho valór 1106.

Atribuisaun prémiu ba manan na’in sira sei hala’o aban iha salaun AMRT, monu loos ho loron komemorasaun konsulta popular, 30 agostu. Tipu Prémiu mak livru istória Timor-Leste nian nomós livru literatura sira.

Jornalista: Rafy Belo | Editora: Rita Almeida