Brazil, Portugal ho Mosambike hala'o enkontru dahaat hosi poeta luzófonu nian

Hahú loron-sábadu ne'e, Brazil, Portugal ho Mosambike hala'o edisaun dahaat hosi Enkontru Poeta sira Lian Portugeza nian.

Iha tinan ne'e, abertura hosi eventu sei akontese iha Muzeu da Repúblika, iha sidade brazileiru Rio de Janeiro, ne'ebé sei simu autoridade sira no poeta sira hosi Angola, Brazil, Guiné-Bissau, Mosambike ho Portugal.

Reuniaun hosi poeta luzófonu sira sei liuhosi mós Lisboa, iha loron 16 Setembru, no taka iha Maputu, iha loron 23 Setembru.

Abertura hosi eventu ne'e sei iha mós lansamentu hosi antolojia komemorativu "Todos os Tons da Poesia", ne'ebé aprezenta poema hamutuk 299 hosi poeta na'in 133 hosi nasaun luzófonu sira.

Organizador sira informa ona katak antolojia "Todos os Tons da Poesia" sei hatudu iha kontrakapa homenajen ida ba poeta mosambikanu Rui de Noronha.

Iha parte balun iha livru nia laran sei fó homenajen ba poeta portugés Bocage no poeta brazileiru Cruz e Sousa.

Iha komunikadu ida ba imprensa, Mariza Sorriso, mentora ho kordenadora hosi projetu, destaka ona katak antolojia aprezenta dalan oioin hodi poetiza liuhosi lian portugeza, aleinde tradús sensibilidade ema nian hosi povu oioin.

"Iha projetu nia klaran, ami hakarak hatama poeta luzófonu barak, inklui balun ne'ebé, tanba kestaun sosioekonómiku sira, laiha oportunidade hodi ema bele rona ka bele le sira. Tanba ne'e, ami halibur poeta sira ho tinan ne'ebé la hanesan no nível oioin hosi vivénsia poétiku, renomadu ho premiadu sira, hamutuk ho sira ne'ebé maka foin tama iha poezia", Mariza Sorriso hatete.

Aleinde lansamentu livru, sei iha mós konferénsia sira iha Brazil ho poeta sira hosi nasionalidade oioin no aprezentasaun muzikal típiku sira hosi nasaun luzófonu ida-idak.

Hafoin Rio de Janeiru, eventu sei liu ba Palásiu Independénsia, iha Lisboa, ho prezensa hosi autoridade sira no mós aprezentasaun hosi poeta sira.

Iha Lisboa mós sei iha palestra ida ho eskritor Luís Filipe Correia Mendes, ne'ebé sei ko'alia kona-ba importánsia integrasaun hosi poeta luzófonu sira ba lian portugeza.

Enkontru dahaat hosi poeta sira sei taka iha 23 Setembru, iha Universidade Politéknika (CREISPU) iha Maputu.

Iha loron ne'e, sei fó sai informasaun sira kona-ba edisaun dalima hosi eventu ne'e, ho sede iha Brazil, Portugal ho Angola iha 2018.

SAPO TL ho Lusa