Kooperasaun RDTL-RI: Tenke Rekoñese Krime Ne’ebé Militar Indonezia

Fundasaun Mahein (FM), 25 Setembru 2017

Kooperasaun RDTL-RI:  Tenke Rekoñese Krime Ne’ebé Militar Indonezia Involve Durante Invasaun

Saida mak sei kontinua husi estadu Indonezia tuir mai hafoin delegasaun militar Indonezia no ulun boot militar Indonezia ka Tentara Nasional Indonesia-TNI, Jeneral Gatot Nurmantyo mai Dili atu haree rate “Taman Makam Pahlawan” ne’ebé semana rua liu ba membru TNI sira halo reabilitasaun?

Dekade ida resin Timor-Leste ukun an hafoin Estadus Unidus fó opsaun hodi hakotu tiha luta okupasaun Indonezia nian. Nasaun ne’ebé hamrik harii husi ran no ruin. Estadu Timor-Leste priense ukun an ida ne’e hodi loke espasu ba kooperasaun iha aspeitu oin-oin iha nivel internasional, rejional nomos bilateral ho estadu Indonezia iha relasaun ne’ebé diak iha aspeitu polítika, ekonomia, kultura, seguransa, defeza militar nst.

Timor-Leste ho Indonezia iha istoria moruk iha tempu resistensia nian. Povu Timor-Leste no militar Indonezia sai tiha inimigu forte iha tempu ne’ebá, tamba hahalok agresaun militar, intimidasaun tortura at hasoru sidadaun inosente sira, depois rekopera fila fali wainhira Timor-Leste deside nia ukun rasik an. Hodi kooperasaun ne’ebé establese entre nasaun rua hamosu amizade ida ne’ebé forte entre povu Timor-Leste ho Povu Indonezia, polítiku sira no mos militar. Nune’e prejensa militar Indonesia - TNI mai halo reabilitasasaun ba rate “Taman Makam Pahlawan” atu fortifika lasu amizade ne’ebé mak iha. Ida ne’e sinal diak iha espasu husi relasaun amizade verdade no rekonsialisaun ne’ebé estado rua promove daudaun no sai tiha ona exemplu ba rezolusaun konflitu iha rejiaun no mundu.

Rekoñese nasaun rua ne’e iha istoria pasadu ne’ebé moruk ho rejime Soeharto no militar Indonezia durante periodu okupasaun iha Timor-Leste. Ohin loron nasaun rua ne’e sai tiha ona exemplu ba mundu ho vizaun ida ‘haluha pasadu hodi hateke ba futuru’ ba dezenvolvimento povu rai rua nian. Iha ne’ebé povu Indonezia ho Timor-Leste iha similaridade kultura, tradisaun no istoria hanesan, saida mak estadu Indonezia rejime Soeharto halo hasoru povu Timor-Leste, povu Indonezia mos lahatene. Rejime Soeharto nian hotu ona. Polítika rekonsiliasaun estadu Indonezia ho Timor-Leste tenke sai duni exemplu ba mundu, laos deit mundu atu gaba maibé ida ne’e sai referensia diak ba povu Indonezia atu labele utiliza agresaun militar ba rezolusaun kontlitu sira, exemplu iha Timor-Leste, iha Papua no mos iha rejiaun no mundu.

To’o ohin loron seidauk iha Komandante ka Eis komandante militar ida iha Indonezia maka hateten katak sira rekoñese krime ne’ebé sira komete oho sidadaun inosente sira iha Timor-Leste, maibé militar Indonezia ho povu Timor-Leste sai ona amigu diak. Ida ne’e hatudu kontrusaun rate iha Timor-Leste apoiu maka’as husi sidadaun sira lao diak los. Ida ne’e hatudu sinal diak atu haree no loke evidensia ne’ebé forte kona-bá rejime Soeharto nian tempu okupasaun Indonezia nian iha Timor-Leste.

Iha loron 20 Setembru 2017 delegasaun boot ida husi militar Indonezia ho ulun boot militar Indonezia mai visita no haree besik liu rate ne’ebé membru TNI sira konstrui iha Baucau. Iha tinan kotuk movimento husi militar senior sira husi Indonezia hamutuk ho komandante boot TNI nian mai iha Timor-Leste atu buka hatudu fatin hakoi Komandate David Alex Daitula no Presidente Nicolao dos Reis Lobato Militar Indonezia sira oho durante funu ne’e to’o ohin loron sai tiha nonok nia laran.

Fundasaun Mahein haree katak Timor-Leste ho Indonezia iha ona polítika intedementu ida atu haree ba krime grave sira ne’ebé akontese iha pasadu ne’ebé halo husi brutalidade militar Indonezia - membru TNI sira durante okupasaun nian. No vizita ofisial sira husi estadu Indonezia nian mai Timor-Leste ba dahuluk sira ba tau aifunan ka sunu lilin deit iha Taman Makam Pahlawan Seroja Dili.

Reabilitasaun rate “Taman Makam Pahlawan” ne’ebé referensia hahu iha Baucau, ne’e atu dignidika sira nia matebian no mos ba relasaun diak ne’ebé estadu Timor-Leste no Indonezia harii ona depois Timor-Leste sai nasaun suberanu ida. Nune’e mos iha espasu atu hare no loke evidensia ne’ebé forte kona-ba rejime Soeharto iha Timor-Leste no presenja ida ne’e hatudu katak laiha ona rejime ne’ebé estadu Indonezia defende. Ida ne’e sai referensia diak ba povu Indonezia, atu fó hanoin ba esatadu Indonezia laiha konflitu ida ne’ebé tenke solusiona ho mobilizasaun militar katak labele utiliza ageresaun militar atu resolve problema tantu iha nasional, rejional no mos internasional. 

Lee liu iha FUNDASAUN MAHEIN