Festa Paskoa…!!!

Jornal Nacional, editorial

Sarani Katolika iha mundo tomak iha Domingo (27/3) selebra festa paskoa ho misa domingo resuresaun. Paskoa nudar pontu koluminasaun sakrifsiu Nai Jesus Kristu nian, terus, mate iha kruz no moris hias husi mate hodi kasu ita ema nia salan.

Jesus Kristu terus no mate iha kruz tamba ita ema nia salan, sala kontra dez mandamentus, ukun fuan igreja nian, sala vertikal no sala horizontal, sala entre ita ema maksalak no sala entre ita ho Nai Maromak.

Antes tama festa paskoa, sarani sira jejum iha 40 dias, labele han barak, lahan naan iha Kuarta no Sesta feira santa, tempo halo penetensia, kariedade no mos hamos salan no hafoun moris ho fiar ba Nai Maromak.

Sarani sira hahu tempo Koaresma ho Kuarta feira Cinzas, Domingo ramos Nai Jesus Kristu tama iha Jerusalem, tama ba semana Santa nebe hahu Kinta feira santa nebe fase apostlu ninia ain, Sesta adorasaun da Cruz hodi relembra Jesus Kristu ninia sofrementu no mate iha kruz, Sabado Aleluia no Domingo resureisaun.

Selebrasaun paskoa laos atu festeiza deit, laos atu reza taka liman hodi husu ba Nai Maromak atu pedua sala nebe ita komete, laos deit festa paskoa atu kontenti tamba konsege ultrapasa jejum iha 40 dias nia laran, importante sentidu paskoa nee rasik atu hafoun moris no hafoun fiar.

“Selebrasaun paskua ne’e, la’os atu hanoin de’it ba Jesus nia mate, maibé paskua ne’e atu hafoun sarani sira nia fiar, no sarani ida-ida mós tenke hanoin ida-ida nia fiar” homilia Dom Virgilio do Carmo.

Los duni amo, selebrasaun nee laos atu hanoin Jesus Kristu Nia mate, Jesus Kristu ninia terus iha kruz importante ita nudar sarani fiar katak Jesus Kristu Terus no mate iha kruz laos ba ninia an rasik maibe atu kasu ita nia sala.

Ita nudar sarani kristaun nebe diak tenki halo reflesaun ba ita ida idak ninia an, la presiza hatudu ema seluk ninia sala maibe ba ita nia an rasik katak sa sala mak ita komete ona? hodi Nai Maromak haruka ninia oan mane mesak, Jesus Kristu mai iha mundo hodi salva ita nia salan.

Paskoa ba tinan nee bispo Virgilio mos koalia sosiedade ohin loron nian nebe mosu atetudi hanaran indifrentismo, halalaok difrensia entre ema ida ho ema seluk nebe makas tebes iha sosiendade nia let.

Sosiedade ohin loron nee fiar ba Nai Maromak hahu mihis dadaun ona ka ita nia fiar lakon dadaun ona, tanba tendensia buka atu kontente deit ho sasan mundo ninian, ambisaun makas ka susar atu simu dotrina igreza ninian iha area sira hanesan moral no soaial nian, tanba gradualmente ema hanoin deit nia an tanba ita nia orgulhu ,egoismu ne’ebe halo ita buka uluk mak ita nia interese pesoal molok ema seluk ninian.

Igreja jeralmente reafirma ba afirmasaun Amo Papa Francisco konaba , indeferentismu tamba indifretismu nee laos iha buat ida ne’ebe iha Europa ka iha ASEAN ka iha mundo tomak maibe ida ne’e Jesus konvida ema hotu atu sai ema ne’ebe apaisonado, laos ema ne’ebe la manas la malirin.

Tan nee ba paskoa nee atu ida idak halo refelesaun ba ita ida idak ninia an atu nunee labele repete sala nebe igual iha paskoa tinan seluk mai. Amin.*