MJ Foun Tenke Lisensiadu Direitu

DILI - Atu halao servisu iha orgaun justisa ho independente, ema neebe assume kargu Ministru Justisa (MJ), tenke mai husi lisensiatura iha area direitu nian.

“Ema neebe sai ministru justisa primeru lugar tenke lisensiadu iha area direitu no lisensiadu pratika laos asesor deit nee barak. Maibe pratika katak kaer netik justisa no tama netik iha tribunal dala ida ka dala rua, no laos tama fali hanesan arguidu. Dalaruma lisensiadu sira direitu bele tama ba hanesan koruptor fali nee la serve, tenke ba hanesan ema autor partisipa iha administrasaun de justisa nee mak iha konstituisaun,” hateten Advogado Privadu Manuel Tilman ba Jornalista sira iha nia knar fatin Pantai Kelapa, Tersa, (12/09/2017).

Nia sublinha, ohin loron funsaun husi instituisaun haat  advogadus, defensoria publiku no juiz sai hanesan moutor ba funsionamentu do tribunal. No ministru justisa neebe sei mai, preserve mos profisaun nee, tanba juiz balu sei marka pasu hela ho terseira klase, iha tinan neen no lima ona, no prokurador tinan neen lima tiha ona, presija haree ba sira nee.

Dezenvolvimentu rai nee atu hetan investimentu osan boot husi estranjeiru, tribunal tenke funsiona diak. Atu hetan traballadores neebe diak, sira mos bele sente sira nia direitu ba salariu no ferias tribunal no sistema de justisa tenke funsiona.

Dala barak iha Sefope balu fokus deit ba iha formasaun, maibe presija haree mos konsulasaun husi patraun no traballadores  sira nia direitu.

Ministru justisa foun mai iha komprensaun atu haree ba osan neebe iha justisa nian, aplika didiak atu bele haree ba fasilidade juiz sira nian no halao mos formasaun ba juiz sira.

Iha fatin seluk, finalista FCS UNTL, Luis Mendonca hateten, area justisa ema neebe halao servisu, ema neebe independente, tanba nee hili ema neebe diak no iha kapasidade neebe masimu.

“Hau hanoin ita nia ukun nain barak mai husi area direito, tanba nee ministru justisa agora hili ema neebe iha koinesementu atu bele kopera ho orgaun justisa hodi haree ba justisa iha rai laran,” esplika Luis.

Akademika nee relata, se deit mak asumi kargu neebe iha, tenke ho responsabilidade atu bele garante servisu neebe diak no imparsial. Tanba povu Timor hakarak justisa neebe justu atu bele garante lia loos.

Nia afirma, maske Timor seidauk sai boot hanesan nasaun sira seluk, maibe sistema justisa iha Timor nian komesa lao ba oin. Hatudu katak laos ema kiik deit maka tama kadeia maibe, iha mos koruptor balu neebe uluk hanesan ukun nain tama ona iha kadeia, hatudu katak justisa justu ba ema hotu. 

Terezinha De Deus | Suara Timor Lorosae