PM: Autoridade sira sei garanti atu ró xinés sira la sai hosi tasi timoroan nian

Primeiru-ministru timoroan garanti ona iha loron-kinta ne'e katak forsa sira seguransa timoroan nian iha orden hodi garanti atu ró xinés sira ne'ebé kaer tubaraun sira iha tasi timor nian la sai hosi tasi-ibun to'o hakotu investigasaun.

"Nune'e PNTL [Polísia Nasional Timor-Leste nian] ho FDTL [Forsa Defeza Timor-Leste nian] iha orden hodi haree asaun ne'e no garanti atu ró sira labele halai", Rui Maria de Araújo hatete iha deklarasaun sira ba Lusa iha Palásiu Prezidensial iha Díli.

Xefe Governu, ne'ebé ko'alia hafoin halo enkontru semana ho xefe Estadu, Francisco Guterres Lu-Olo, refere ona ba kazu hosi ró xinés hamutuk 15 ne'ebé iha lisensa hodi halo peska iha bee timoroan nian no ne'ebé maka sai hanesan objetivu hodi halo operasaun iha loron-sábadu.

Operasaun ne'e halo hosi polísia timoroan, ho baze hosi mandatu Ministériu Públiku timoroan nian, ho apoiu hosi unidade marítimu no asisténsia hosi organizasaun ambiental Sea Shepherd.

Gary Stokes, responsável hosi asaun hosi Sea Shepherd, hatete ona ba Lusa katak hetan ona ró sira ne'e halo hela asaun liuliu kaer tubaraun iha operasaun ida ne'ebé halo iha loron-sábadu liubá iha largu portu Com nian, iha kosta norte Timor-Leste nian.

Ró sira ne'e hanesan hosi empreza xineza Hong Long Fisheries ho Pingtan Marine Entreprises no hahú tinan 2016 nia rohan iha lisensa ida hosi halo operasaun iha tasi timoroan nian.

Operasaun envolve ona ró Ocean Warrior hosi Sea Shepherd ne'ebé, ho ró sira ne'ebé uza motor no lalais, ajuda ona lori efetivu sira PNTL nian, ne'ebé halo ona operasaun iha ró sira nia laran, akompaña no rejistadu hosi "drone sira" no hosi kámara sira hosi organizasaun ambiental nian.

Governante garanti ona katak situasaun ne'e sei analiza hosi parte rua, iha nível Ministériu Públiku nian hodi haree katak iha ka la'e krimi, no hosi Ministériu Agrikultura hodi determina katak iha ka la'e infrasaun ba lisensa sira.

Rui Araújo la hato'o detalle sira hosi kazu ne'e no hatete katak sei hein desizaun sira bainhira hakotu investigasaun sira.

SAPO TL ho Lusa | Foto@ Jake Parker/Sea Shepherd/EPA/Lusa