Profesór Maka Erói Loloos Nasaun Nian

DILI, (TATOLI) – Ministru Edukasaun no Kultura (MEK), Fernando Hanjam, hateten maske eskola barak ho kondisaun ne’ebé seidauk sufisiente no iha distánsia ne’ebé dook, liu-liu iha área remota sira, profesór sira sei la’o to’o fatin atu hala’o sira-nia kna’ar.

“Tanba ida ne’e, ita konsidera ita-nia profesór sira maka erói loloos nasaun nian”, ministru fó razaun bainhira hato’o mensajen ba profesór sira iha Timor-Leste (TL) ne’ebé Tatoli asesu relasiona ho komemorasaun loron nasionál profesór TL ne’ebé monu iha 29 outubru 2017.

Nia reforsa, profesór sira maka xave ba susesu ba sistema edukativu, tanba maske kondisaun infraestrutura, ekipamentu no materiál sira seidauk di’ak, sira mak kaer posibilidade atu transforma alunu sira atu sai sidadaun ne’ebé di’ak.

“Lori VII Governu Konstitusionál no Ministériu Edukasaun no Kultura nia naran, ha’u hakarak agradese ba profesora no profesór sira nia dedikasaun, profisionalizmu, no empeñu hala’o sira-nia kna’ar”, governante ne’e agredese.

Nia hatutan, tinan liubá MEK halo ona selesaun anuál iha nivel nasionál ba mellór profesór sira, ho objetivu atu rekoñese sira-nia kna’ar pesoál no profisionalizmu.

Profesór sira ne’e balu hetan ona mós rekoñesimentu iha nivel rejionál, liuhusi inisiativa Liurai-feto Tailándia ne’ebé fó prémiu ba profesór ne’e.

Inisiativa sira-ne’e maka reprezenta motivasaun ida ba profesór sira hotu atu kontinua hadi’a kompeténsia pesoál no profisionál hodi hasa’e kualidade.

“Hau hakarak remata ha’u-nia mensajen ida-nee, ho reflesaun ida husi Salomão Becker, ne’ebé dehan Profesór ne’e profisaun. Edukadór ne’e misaun”, konklui ministru.

Entretantu, iha 1994, UNESCO, Organizasaun Nasaun Unida ba Promosaun Edukasaun, Siénsia no Kultura, define outubru nu’udar Loron Mundiál ba Profesór, nu’udar dalan ida atu rekoñese servisu ne’ebé profesór sira dezenvolve hodi hanorin ka fó matenek ba sidadaun sira iha prosesu atu harii sosiedade ne’ebé justu no solidáriu.

Ho konsiénsia katak profesór nia knaar iha área edukasaun importante tebes, no metade husi populasaun iha idade eskolár, nune’e selebra ba dala uluk iha loron 29 outubru 2017, liuhusi aprovasaun Rezolusaun Governu nº.29/2017, iha loron 7 juñu, Loron Nasionál ba Profesór sira iha Timor-Leste.

Loron ida-ne’e, objetivu fó omenajen ba profesór sira hotu ne’ebé lorloron kontribui hodi hadi’a no hasa’e kualidade edukasaun ba ita-hotu nia oan iha país ida ne’e.

Jornalista: Rafy Belo | Editora: Rita Almeida

Foto: Ministru Edukasaun no Kultura, Fernando Hanjam. Foto Tatoli/António Goncalves