Rúsia fó kilat hamutuk 5.000 ba Filipina hodi luta hasoru grupu Estadu Islámiku

Governu Rúsia, iha loron-kuarta ne'e, fó ona kilat Kalashnikov hamutuk 5.000 no kareta militar hamutuk 20 ba Filipina hodi luta hasoru grupu estremista Estadu Islámiku (EI), iha serimónia ida iha Manila ne'ebé lidera hosi Prezidente Rodrigo Duterte.

Prezidente filipinu asisti asinatura hosi kontratu entrega nian ba forsa armada sira Filipina nian hosi lote ekipamentu militar rusu nian ne'ebé inklui mós kilat-musan hamutuk millaun ida no kapasete besi-asu nian hamutuk rihun lima.

Ministru Defeza filipinu nian, Delfín Lorenzana, hatete katak hanesan "doasaun ida lahó folin" no Governu rusu "hakarak ajuda" Filipina "hodi kombate terorizmu, tanba luta mós hasoru terorizmu iha nia nasaun no ajuda iha luta global hasoru terorizmu".

Doasaun ne'e to'o liutiha loron ida hafoin akordu koperasaun tékniku militar ne'ebé asina hosi Lorenzana ho nia homólogu rusu, Sergey Shoygu, iha ámbitu hosi reuniaun ida hosi ministru sira Defeza nian hosi Asosiasaun Nasaun sira Sudeste Aziátiku (ASEAN) nian ne'ebé hala'o iha Clark, hosi kilómetru 100 hosi norte Manila nian.

Tuir akordu ne'ebé asina iha loron-tersa, nasaun rua kopera iha "investigasaun, apoiu ba produsaun no posibilidade interkámbiu ba espesialista sira no formasau hosi tropa sira ba programa hamutuk", haktuir hosi komunikadu ofisial.

Dezde kaer poder iha Juñu 2016, Prezidente Filipina nian hahú hadook aan hosi aliadu tradisional, Estadus Unidus, liuliu iha ámbitu militar, no hakbesik ba Xina ho Rúsia iha defeza no mós iha área sira diplomátiku no ekonómiku nian.

SAPO TL ho Lusa