Garuda Sei Lá semo Iha Loron 15 Novembru

DILI, (TATOLI) - Kompañia aéreu, Garuda Indonézia, sei lá semo iha loron 15 Novembru 2017 tanba hakarak kumpre lei ne’ebé estabelese iha Timor-Leste.

Diretór Ezekutivu, Servisu Rejistrasaun no Verifikasaun Emprezariál (SERVE), Florêncio Sanches, informa Garuda halo ona akordu ida ho entidade timoroan no hatudu ona dokumentu atu semo iha loron 15 ne’e maibé Garuda seidauk sai entidade iha Timor-Leste, nune’e tenke banati lei hafoin semo.

“Ha’u lee hotu dokumentu sira ne’e mas só para entidade rua ne’e, Garuda husi Indonézia ho entidade husi Timor-Leste. Ne’e di’ak ona maibé labele semo tanba lei foun ne’ebé foin aprova no publika iha jornál repúblika tinan ida ne’e, husi dia 15 Setembru ba oin mak kualkér negósiu ne’ebé mai Timor-Leste, Governu apresia no benvindu maibé tenke tuir kritériu hotu ne’ebé lei ne’e husu”, Florêncio hatete iha Matadouru, ohin.

Hafoin hasoru malu ho reprezentante Garuda nian horisehik, ne’ebé husu atu semo ho entidade Timor-Leste nia naran, Florêncio esplika entidade bele reprezenta empreza aéreu ne’e semo bainhira aviasaun sivíl Timor-Leste fó kontratu maibé seidauk fó maka labele semo no tenke kumpre uluk lei.

“Tanba ne’e sira hakarak halibur dokumentu hotu, ne’ebé husu atu lori bá iha notariadu públiku iha Indonézia atu sira sertifika depois lori bá embaixada Timor-Leste iha Jakarta atu sertifika tan. Ne’e sei presiza tempu entaun sira labele semo iha loron 15”.

Garuda mós hatama ona pedidu maibé husi parte Aviasaun Sivíl Timor-Leste seidauk aprova tanba SERVE no aviasaun komunika ba malu ona antes atu halo uluk rejistu iha SERVE ne’ebé fasil no simples liu to’o de’it loron lima bele hetan ona lisensa.

“Ami komunika ba malu tanba ita-nia lei mak haruka ema rejista uluk mak halo negósiu. Ezemplu, Citilink halo ona erru mezmu semo tiha ona maibé nia viola ona lei, SERVE sei buka meiu liuhusi unidade jurídika atu aplika artigu ba nia katak buat hotu loos ona prontu selu nia multa liuhusi erru ne’ebé halo iha pasadu. Ha’u sei haruka karta ofisiál ida ba sira atu selu multa”.

Multa ne’e sei aplika mós ba Silk Air no Air North ne’ebé kada kompañia aéreu sei selu dolar 5000 tanba lei fó kompeténsia tomak ba SERVE atu ezekuta ida ne’e.

Jornalista: Maria Auxiliadora | Editór: Manuel Pinto