DILI, (TATOLI) – Nu’udar
liman kro’at povu nian, Majór Jenerál FALINTIL-Forsa Defeza Timor-Leste
(F-FDTL), Lere Anan Timur, hatete forsa tenke mantein nafatin pozisaun neutru
iha eleisaun antesipada.
“FALINTIL-Forsa Defeza
Timor-Leste (F-FDTL) ho Polísia Nasionál Timor-Leste (PNTL) iha kordenasaun no
koperasaun hodi mantein seguransa iha rai-laran, atu sidadaun sira livre no
hakmatek hodi hala’o nia direitu demokrátiku”, hatete Lere durante diskursu iha
ámbitu selebrasaun transformasaun FALINTIL ba F-FDTL ba dala 17 iha Kuartél
Fatuhada, ohin.
Tanba ne’e F-FDTL labele iha
partidu polítiku maibé rona de’it ba órgaun soberanu kompetente sira.
“Forsa armada apartidáriu nafatin
hodi sai loloos ba lutu Nasaun ho nia misaun própriu ba defeza esterna”.
Forsa armada la’ós matan delek ka
sai analfabetu, forsa armada tenke hatene saida mak polítika, hatene saida mak
loos no sala atu ema la fasilmente manobra.
Ezemplu ida mak polítiku sira
barak aproveita atu alkansa sira nia interese no objetivu polítiku hanesan kazu
iha Guiné Bissau no dadaun ne’e akontese iha Myanmar.
Tanba ne’e, forsa labele mete
polítika, ba nia komandante sira, ofisiál sira no responsabilidade iha forsa
laran maibé tenke aprende no hatene polítika, nune’e mós tenke hatene ánaliza
perspetiva hotu no iha situasaun balun tenke fó hanoin duni, kria kondisaun
di’ak, favorese situasaun hakmatek atu ema bele livre hodi hala’o kna’ar.
Forsa Armada tenke hala’o duni
prevensaun tuir nia papél, la’ós hein atu reprime de’it, enkuantu halo
prevensaun ho dedikasaun no matenek sei hetan respeitu no konfiansa hosi povu.
Jornalista: Zezito Silva | Editora:
Rita Almeida
Imajen: Majór Jenerál F-FDTL,
Lere Anan Timur, bainhira halo diskursu iha tinan transformasaun FALINTIL ba
F-FDTL iha Kuartél Fatuhada, ohin. Foto António Goncalves
Sem comentários:
Enviar um comentário