Marí Husu Apoiante FRETILIN Diuk Ba Provokasaun

DILI, (TATOLI) - Sekretáriu Jerál Partidu FRETILIN, Marí Alkatiri husu ba militante no simpatizante FRETILIN atu diuk ba provokasaun sira ne’ebé adversáriu polítiku sira lansa.

“Dalan ne’ebé adversáriu sira uza agora ne’e maka ho provokasaun. Bainhira ita responde, sira buka atu rekopera sira nia pozisaun. Tanba ne’e, ita hotu tenke diuk ba sira nia provokasaun,” Marí hato’o kestaun ne’e liuhusi konsolidasaun partidu FRETILIN iha Matadouro, Suku Vila Verde, Postu Administrativu Vera Cruz, Munisípiu Dili, sábadu horisehik.

Nia dehan adversáriu nia provokasaun maka oinsá lori nia ho Kay-Rala Xanana Gusmão bele kontra malu, insulta, tolok, deskriminasaun ba rasa no relijiaun.

“Hakilar ba. Tolok karik tolok ba. Ha’u baibain tiha ona,” Marí dehan iha konsolidasaun ho tema “Hametin estrutura baze FRETILIN atu hasoru eleisaun antesipada”.

Alkatiri husu ba militante no simpatizante FRETILIN hosi baze to’o iha leten atu hametin FRETILIN no hametin mós ema hotu-hotu ne’ebé hakarak FRETILIN manán iha eleisaun atu salva Nasaun ida ne’e.

“Ita hotu tenke serbisu maka’as para labele husik ema seluk tama hodi mai bosok povu. Ha’u kontinua hamriik iha FRETILIN nia oin para FRETILIN bele manán,” Marí afirma.

Entertantu koordenadór partidu FRETILIN Suku Vila Verde garante katak FRETILIN sei manán iha suku ne’e.

Tuir dadus eleisaun parlamentár tinan kotuk, FRETILIN hetan votus iha suku Vila Verde kuaze 1446 hosi votante rihun lima resin maka tuir eleisaun.

Observasaun TATOLI iha konsolidasaun refere militante no simpatizante FRETILIN partisipa ho Entusiazmu. Partisipa mós militante sira hosi partidu seluk, enkuantu konsolidasaun hahú iha tuku 11:00-13:30 Otl no hetan animasaun hosi banda múzika Fitun Maubere.

Jornalista: Xisto Freitas | Editór : Manuel Pinto

Imajen: Konsolidasaun partidu FRETILIN iha Suku Vila Verde. Imajen Ajénsia Tatoli/Xisto Freitas.