DÍLI, (TATOLI) - United Picture,
empreza timoroan ida, lansa filmajen badak, A[R]MANDA ho gravasaun iha
Timor-Leste (TL) no autór sira mós timoroan sira. Baze ba filme A[R]MANDA mak
kultura no kostume tradisionál timoroan nian.
Diretora, produsaun filme
A[R]MANDA, Eufrasia Vieira, ne’ebé sei protagoniza nu’udar A[R]MANDA iha filme
ida ne’e akresenta katak istória filme ida ne’e ko’alia kona-ba dame ho background Timor
nia kultura, ho tradisionál ne’ebé forte.
“Ne’e duni, nia settingan ha’u
hili cem anos atrás tanba hatudu katak ita-nia natureza tempu uluk
hanesan ne’e,” dehan autór filme, A[R]MANDA, Eufrasia Vieira, perante públiku
iha konferénsia imprensa, iha Sentru Konvensaun Díli (CCD-sigla portugés), iha fim-de-semana ne’e.
“Ne’e duni ita-nia kultura
tradisionál labele lakon, sei bele ita kontinua nafatin tanba bainhira ita
hatais vestidu bonita, la’ós estranjeiru nia produtu ou rai seluk mas produtu
ita nian ne’ebé mak ita-nia nai ulun sira, família sira, inan doben sira halo
husi nia sofrimentu, ho sira-nia tempu, ha’u agradese tebes [tais ne’ebé ha’u
uza ne’e tais husi feto timoroan sira, elegante],” nia reforsa.
Filme A[R]MANDA ne’e filme
kona-ba domin nian la’ós kona-ba funu. “Ami lakohi halo filme kona-ba funu,
maibé ami hakarak halo filme kona-ba domin, domin ne’ebé kona-ba nia kultura,
domin ne’ebé kona-ba ita-nia identidade, domin entre ema hanesan maun-alin i
bin-alin tanba ita Timor, ran ida de’it,” Eufrasia Vieira fó razaun.
Nia reforsa, A[R]MANDA mós
ko’alia kona-ba kestaun nasionál, feto-nia partisipasaun iha sosiedade nomós
problema doméstika no ninia orijen.
Filme A[R]MANDA ne’e, nia sinopse
katak A[R]MANDA nia aman ema portugés, nia inan ema Timor. A[R]MANDA nia kaben
ho mane Timor [Alberto].
“Iha ne’e ami foti barlake.
Alberto nia fó barlake A[R]MANDA nian ho folin ne’ebé boot tebes, entaun nia
sente katak nia fó barlake A[R]MANDA ho folin ne’ebé boot nia la hodi ba
pozitivu maibé negativu. Katak, nia fó folin ona, nia halo konforme tuir nia
hakarak; nia halo abuzu, violénsia doméstika ba A[R]MANDA entaun A[R]MANDA
sofre,” nia esplika.
Nia mensajen ne’e katak ita hodi
ita-nia kultura, barlake ho di’ak ho pozitivu la’ós ba negative. Tanba ita fó
folin feto hanesan ita-nia kultura tanba hanesan ita-nia respeitu, família,
feto. Ne’e duni, bainhira halo sala reprezenta ita-nia.
“A[R]MANDA lori mensajen paz,
domin no fim harohan ita-nia kultura, ita-nia identidade, Timor la’ós
rai de’it maibé ema. Bainhira ema moris iha paz, rai mós paz,” Diretora,
produsaun filme A[R]MANDA, Eufrasia Vieira esklarese.
Ministru Turizmu, Manuel
Florêncio Vong hateten katak Ministériu Turizmu (MT) fó apoiu tomak ba
inisiativa ida ne’e tanba turizmu hanesan buat ida ne’ebé liga ho
entretenimentu, indústria entretenimentu. Filme hanesan parte ida atu bele
lori, aprezenta Timor-Leste nu’udar destinu turístiku ba iha rai seluk.
“Ita hotu hatene Timor-Leste
hanesan destinu turístiku foun, destinu turístiku emerjente i presiza fó
prioridade ba buat rua,” dehan governante ne’e.
Prioridade, ida mak ita presiza
tebes atu dezenvolve no kualifika ita-nia produtu turístíku tomak.
Ida seluk mak ita presiza halo
promosaun marketing no investimentu iha ita-nia produtu sira tomak.
Hodi Ministériu Turizmu nomós ba
ita-nia komunidade tomak ne’ebé mak hadomi turizmu, ita fó ita-nia apoiu tomak,
ita fó ita-nia aplauza ba inisiativa di’ak ida ne’e.
“Ha’u-nia admirasaun ida seluk
mak bainhira ita haree turizmu hanesan indústria ida, ita sei iha faze inisiál
hanesan ne’e, dala barak ita sempre hanoin, atu hahú husi ne’ebé? Masmana
Eufrazia mai ho inisiativa atu loke dalan oinsá atu lori Timor-Leste ba iha
mundu no lori mundu mai iha Timor,” nia akresenta.
Tanba ida ne’e, mak valorizasaun
ba iha kultura sai hanesan rekursu turístiku ida ne’ebé importante tebes ba iha
rai ida ne’e nomós ita-nia natureza ne’ebé mak furak [fatin hirak ne’ebé sei
sai hanesan shooting] hatudu momoos rikusoin Timor-Leste ninian.
Ita-nia fiar, ita-nia kultura,
ita-nia istória no ita-nia natureza; tanba razaun ida ne’e mak Ministériu
Turizmu fó apoiu tomak, pelo menus bele responde ona ita-nia
preokupasaun Timor ne’e iha ne’ebé?
Maibé fiar ho filme ida
ne’e, ema sei husu tuir Timor-Leste iha ne’ebé? No buka atu hatene. Ita hein
katak filme ida ne’e mós, bele reprezenta inisiativa Ministériu Turizmu nian ho
organizasaun mundiál ne’ebé mak sei halo lansamentu ofisiál, vizita Timor-Leste
2030, ne’ebé mak sei hala’o ofisialmente iha abril ne’e nia laran.
“Ho nune’e ita-nia target [alvu]
katak até 2030, ita bele simu turista; ha’u hanoin A[R]MANDA bele fó mós kontribuisaun
atu halo promosaun, vizita Timor-Leste 2030,” garante ministru turizmu, Manuel
Vong.
Governante ida, Mariano Sabino,
bainhira partisipa iha atividade ne’e afirma katak atividade halo filme ida
ne’e hanesan eroiku tebes ba Timor-Leste nia ukun rasik aan. “Ita konsolida
buat tolu importante,” friza governante ne’e.
Ida, konsolida ita-nia polítiku
para ita hamriik hanesan soberanu, seluk ita konsolida ita-nia rikusoin para
ekonomikamente bele ita hamriik ‘iha ita-nia ain leten’, ida seluk mak ita atu
hatudu ba mundu katak ita iha identidade rasik, iha kultura rasik, iha lisan,
iha tradisaun, igreja katólika, língua portugeza ne’e parte husi ita-nia
identidade ne’ebé mak hatudu ba ema seluk katak ita diferente.
“Entaun, inisiativa ida ne’ebé
mak ekipa ida ne’e halo, ne’e eroíku tebes i governu apresia tebes tanba iha
prosesu konstrusaun estadu, konstrusaun nasaun, até konstrusaun nasaun ne’e ita
mais ba iha ita ko’alia polítika, maibé konstrusaun nasaun ne’e buat moris ida;
valores, ita-nia hahalok, ita-nia lisan, beiala sira-nia mehi,beiala sira-nia
moris, ita-nia uma lisan, barlake, buat sira ne’e hotu hola parte integradu iha
konstrusaun nasaun,” nia apresia.
Konstrusaun nasaun mak hatudu
ita-nia nasaun ne’e diferente ho nasaun seluk, tanba ne’e iha planu estratéjiku
mós ita tau ona iha ne’ebá, ita iha elementu haat iha planu estratéjiku;
elementu ida mak dezenvolvimentu sosiál, kulturál i turizmu ho artista sira,
hothotu hola parte iha ne’e.
Ba kompañia, doadór sira hotu
ne’ebé mak apoiu, ministru Mariano hateten, apoiu ne’e la monu ba rai, governu
apresia tanba iha momentu ida ne’ebé governu difísil iha osan atu aloka ba
setór hotu-hotu imi bele hamriik para fó apoiu, ida ne’e mak dehan ita
timoroan, ita pertense husi ita-nia rain, ita pertense husi ita-nia
dezenvolvimentu.
Pasadu ita hotu pertense husi
sofrimentu, sakrifísiu husi luta, ohin ita pertense husi dezenvolvimentu, ita
buka atu hakmatek, buka ba moris di’ak, buka ba hadomi malu, buka para esplora
ita-nia kultura sira.
Pasadu ita reprezenta sofrimentu
oioin maibé ita tenke hakat ona ba oin katak harii Timor foun ida ba timoroan
tomak, timoroan hotu tenke orgullu ne’e nu’udar Timor ninian, hothotu tenke
hola parte i pertense husi prosesu dezenvolvimentu ne’ebé iha. Ita agradese no
apresia ba filme A[R]MANDA.
“Ha’u hanoin katak ida ne’e loke
dalan para depois sei tuir mai, i filme ida ne’e sei sai banati mós ba jerasaun
sira seluk, ba joven sira seluk para hothotu bele tuir,” nia espera.
Prezidente RTTL-EP, Gil Da Costa,
kontente no pronto apoia produsaun filme A[R]MANDA. “Ha’u Kontente,” dehan
autoridade másima, Rádiu Televizaun Timor-Leste, Empreza Públiku ne’ebé sai mós
parseiru ba produsaun filme ne’e.
Nia akresenta, dalabarak ema
ko’alia kona-ba polítika de’it, dala barak ko’alia konaba funu de’it maibé la
hatene ko’alia kona-ba domin, ha’u sente istória A[R]MANDA istória ida ne’ebé
importante ba ita hotu katak kuandu ita fó barlake ba ita-nia feto, ita labele
hanoin katak ita hola ona feto ida ne’e, ne’ebé ita halo konforme ita-nia
hakarak maibé tuir tradisaun ne’ebé ita aprende, fó barlake porque ita
respeita, fó dignidade boot liu ba iha ita-nia moris.
“Ha’u sente mana Eufrasia ne’ebé
sei sai hanesan A[R]MANDA, reprezenta la’ós Timor de’it maibé liliu reprezenta
Buibere sira ne’ebé tinan ba tinan hetan violasaun, hetan tortura tan de’it
liafuan ida barlake ne’e.Maibé, filme ne’e sei reprezenta ita katak barlake
ne’e atu dignifika Buibere sira-nia direitu, nia valór sai aas liu,” dehan
prezidente RTTL-EP.
Tanba ne’e mak Buibere ida
reprezenta ita iha mundu tomak, tuir nia, orgullu. “Ita fó hakat ida ba oin,
ita fó espasu ida bele reprezenta ita hotu, la’ós ida de’it maibé ita fó
motivasaun ba ita-nia joven sira ne’ebé foin sa’e bele sai kreativu liu, sai
inovadór tanba presiza espresaun ho sentimentu ne’ebé di’ak, ho pozitivu,
labele hanoin tan funu,” nia konklui.
Entretantu produsaun filme ne’e
patrosíniu husi MT, RTTL-EP, Timor Plaza, Timor Telecom, RENTLO, NITL, KMANEK,
SUPERBOCK, Pateo, Entreposto, RMS, Silvia Dili no selseluk tan.
Autór prinsipál ba filme ne’e mak
Eufrasia Vieira nu’udar A[R]MANDA, Domingos Correia nu’udar Alberto, Isabel de
Jesus nu’udar Nina, belun, Joel Martins, Gaspar Sarmento nu’udar vendedór
ambulante, Junior Turkel nu’udar oan, no Laurentino Alves nu’udar amo.
Filme ida ne’e sei ba aprezenta
iha Festivál Internasionál Sinema iha 2019, iha Estadu Unidu Amérika (EUA).
Bele akompaña mós iha:https://web.facebook.com/pg/armandafilm/posts/?ref=page_internal
Jornalista: Rafy Belo | Editór:
Manuel Pinto
Sem comentários:
Enviar um comentário