Portugal bolu embaixador iha Moskovo nian hodi ko'alia

Ministru Negósiu Estranjeiru portugés nian hatete ona, iha loron-tersa ne'e, ba RTP katak "Portugal bolu ona nia embaixador iha Moskovo hodi ko'alia", hafoin envenenamentu ba eis-espiaun rusu Serguei Skripal iha Reinu Unidu, ne'ebé Londres atribui responsabilidade ba Moskovo.

Iha entrevista ba Telejornal, Augusto Santos Silva rejeita ona ideia katak Portugal la halo parte hosi movimentu espulsaun hasoru diplomata rusu sira, hodi fó hanoin katak nasaun apoia ona desizaun sira ne'ebé foti kona-ba asuntu ne'e hosi Uniaun Europeia no hosi NATO.

Iha entrevista ida ba Jornal da Noite hosi SIC Notícias, xefe diplomasia portugeza klasifika ona xamada ba embaixador portugés iha Moskovo hanesan resposta ida ba kazu ne'e.

"Ne'e hanesan prosesu dinámiku ida, ne'ebé ami tenki hala'o ho kuidadu", ministru hatutan, hodi garanti katak kona-ba kazu ne'e "hanoin dalan tomak hosi diplomasia nian".

Hafoin fó hanoin katak tradisaun diplomátiku portugeza "maka la'ós konfrontu nian", Santos Silva afirma ona katak Portugal apoia ona desizaun hosi Uniaun Europeia, hodi bolu nia embaixador hodi ko'alia, no mós desizaun hosi sekretáriu-jeral NATO nian hodi hasai diplomata na'in hitu.

"Laiha ema ida maka hein atu akontese aumentu ida ne'ebé la razoável", afirma hosi ministru, maski konsidera katak kazu ne'e "tenki iha resposta ida hanesan hosi parte europeu sira".

Portugal "solidáriu tebes" ho Uniaun Europeia no NATO no "respeita dalan tomak ba reasaun sira", nia hatete.

Kona-ba kritériu saida maka hili bainhira Portugal avansa hodi hasai diplomata rusu sira, Santos Silva lakohi hatán, hodi hatete katak prosesu ne'e hanesan Segredu Estadu nian.

Maibé, nia adianta katak kritériu ne'ebé parseiru europeu sira uza maka hasai "ema sira ne'ebé maka besik liu ba intelijénsia duké sira ne'ebé besik ba parte diplomasia nian", hodi afirma katak iha informasaun hosi serbisu informasaun portugeza sira ne'ebé maka labele fó sai.

Ministru Negósiu Estranjeiru rekorda mós katak Portugal halo parte hosi grupu europeu ne'ebé fó kastigu ekonómiku sira ba Rúsia hafoin invazaun iha Krimeia.

Iha loron 14 Marsu, Reinu Unidu anunsia katak hasai diplomata rusu na'in 23 hosi teritóriu britániku no konjela relasaun bilateral sira ho Rúsia, hodi hatán hasoru envenenamentu ba eis-espiaun rusu Serguei Skripal ho gás neurotóxiku ida iha loron 04 Marsu iha sidade ingleza Salisbury.

Moskovo hatán hodi hasai diplomata britániku na'in 23 no suspende atividade sira hosi British Council iha Rúsia.

Skripal nia kazu hamosu krizi diplomátiku todan ida, ne'ebé maka aumenta ba nasaun aliadu sira Reinu Unidu nian, hanesan Estadus Unidus no Estadu-membru oioin hosi Uniaun Europeia, entre sira maka Alemaña, Fransa ho Polónia, ne'ebé desidi hasai mós diplomata rusu sira.

SAPO TL ho Lusa