Eis-Prezidente timoroan José
Ramos-Horta felisita ona, iha loron-tersa, Xanana Gusmão ho delegasaun timoroan
no Governu australianu tanba hetan ona tratadu istóriku hosi fronteira tasi
nian entre nasaun rua, ne'ebé asina ona iha loron-tersa iha Nova Iorke.
Maski nune'e, atual ministru
Estadu adverte katak, lahó akordu hosi esplorasaun Greater Sunrise nian, nasaun
fila fali "estaka zero" no tenki hetan alternativu lalaias sira hodi
finansia Estadu.
"Iha fronteira tasi hanesan
importante maibé laiha rezulta hosi akordu ida ba dezenvolvimentu komersial
Greater Sunrise nian, Timor fila fali ba estaka zero", nia hatete iha Díli
bainhira hakotu inaugurasaun ba loja Vista Alegre iha kapital timoroan nian.
Bayu Undan - posu prinsipal
ne'ebé esplora tiha ona iha Tasi Timor - "besik hotu ona no ami iha de'it
rezerva sira hosi Fundu Petrolíferu no ho baze iha gastu atual sira sei la dura
tinan sanulu" nune'e nasaun tenki hetan dalan sira, "iha Sunrise, iha
esplorasaun offshore ka onshore sira, hodi finansia nasaun", nia afirma.
Responsável sira hosi Timor-Leste
ho Austrália asina ona iha loron-tersa Tratadu entre Austrália ho Repúblika
Demokrátika Timor-Leste ne'ebé estabele sira nia limiti marítimu iha Tasi
Timor, konsege hetan iha negosiasaun sira ne'ebé halo ho patrosíniu hosi
Komisaun Konsiliasaun ida ONU nian.
Ramos-Horta husik ona
"parabéns lahó rezerva sira, kalorozu, ba Xanana Gusmão", ne'ebé nia
hatete hanesan "mane ida vizaun nian, arkitetu hosi estratéjia nian",
maibé mós ba primeiru-ministru no ministru Negósiu Estranjeiru australianu
sira, Malcolm Turnbull ho Julie Bishop, "ne'ebé ho sentidu Estadu nian
hili ho polítika diferente ida hosi governu anterior sira, hodi rekoñese lalais
direitu internasional ne'ebé hanesan klaru, negosia no aseita liña medianu".
"Parabéns mós ba komisaun
ONU nian ne'ebé, tuir ministru Agio Pereira hatete mai ha'u, katak halo ona
serbisu maka'as ida, ho imparsialidade maka'as no kompeténsia hodi ajuda lori
parte rua ne'e hodi hetan solusaun.
Dokumentu ne'e negosia hosi ekipa
ida ne'ebé lidera hosi Xanana Gusmão, ne'ebé la marka prezensa iha serimónia,
maibé hetan felisitasaun tanba susesu ne'ebé ema barak konsidera hanesan
imposível, tanba pozisaun ne'ebé maka Austrália iha to'o agora.
Aleinde fronteira sira, akordu
estabelese estatutu jurídiku hosi kampu gás Greater Sunrise nian,
estabelesimentu hosi Rejimi Espesial ida ba kampu, dalan ida ba dezenvolvimentu
hosi rekursu ho fahe reseita sira ne'ebé hetan.
Maibé laiha posibilidade hetan akordu
ida kona-ba modelu dezenvolvimentu nian, iha konkretu kona-ba gazodutu hosi
Greater Sunrise ba Darwin - fó ba Timor-Leste 80% hosi reseita - ka ba súl
Timor-Leste nian ne'ebé sei simu 70% hosi reseita sira.
"Fronteira sira hanesan
direitu ida ba nasaun tomak. Sei lori tempu barak ka oituan. Iha nasaun ne'ebé
independente kleur ona no seidauk iha sira nia fronteira rezolvidu. Indonézia,
foin lalais ne'e, maka taka parte ida hosi ninia fronteira sira ho Índia",
Ramos-Horta hatete.
"Timor konsege mós rezolve
problema ida ho Austrália. Agora sei hahú ko'alia fronteira tasi sira ho
Indonézia no hakotu negosiasaun sira kona-ba fronteira rai nian", nia
hatutan mós.
SAPO TL ho Lusa
Sem comentários:
Enviar um comentário