Timor-Leste/Eleisaun: CNE aprova ona koligasaun pré-eleitoral tolu ba votu loron 12 Maiu

Komisaun Nasional Eleisaun nian (CNE) valida ona koligasaun pré-eleitoral tolu ne'ebé sei aprezenta ba eleisaun parlamentar loron 12 Maiu nian iha Timor-Leste, no formuláriu sira ba koligasaun seluk ruma "foti ona", hatete hosi prezidente hosi órgaun eleitoral ne'e.

Alcino Baris, prezidente hosi Komisaun Nasional Eleisaun nian (CNE), konfirma ona ba jornalista sira katak informasaun hosi koligasaun tolu publika tiha ona iha Jornal Repúblika

.

Frente Dezenvolvimentu Demokrátiku (FDD) - koligasaun dahuluk ne'ebé kompleta rekizitu tomak hodi bele konkore iha eleisaun antesipadu loron 12 Maiu - inklui partidu polítiku haat ne'ebé aprezenta ketak-ketak iha eleisaun parlamentar tinan 2017b nian: Partidu hosi Unidade no Dezenvolvimentu Demokrátiku nian (PUDD), Uniaun Demokrátika Timoroan (UDT), Frente Mudansa (FM) ho Partidu Dezenvolvimentu Nasional (PDN).

Responsável hosi CNE konfirma mós katak valida ona Aliansa hosi Mudansa ba Progresu (AMP), ne'ebé halibur forsa boot tolu hosi opozisaun, Congresso Nacional da Reconstrução Timorense (CNRT), Partidu Libertasaun Popular (PLP) ho Kmanek Haburas Unidade Nacional Timor Oan (KHUNTO).

Iha semana liubá, valida mós koligasaun datoluk, Movimentu hosi Dezenvolvimentu Nasional (MDN) ne'ebé halibur partidu haat ne'ebé iha tinan 2017 aprezenta ketak-ketak.

Iha konkretu, halo parte hosi Asosiasaun Popular Monarkia Timoroan (APMT), Partidu Liberta Povu Aileba (PLPA), Partidu Movimentu Libertasaun Povu Maubere (MLPM) no Unidade Nasional Demokrátika hosi Rezisténsia Timoroan nian (Undertim).

"Partidu sira seluk foti mós formuláriu sira ne'ebé presiza, maibé to'o agora seidauk aprezenta tan koligasaun ruma. Bele halo to'o loron 12 Marsu", nia esplika.

"Koligasaun sira agora iha loron 30 ba partidu polítiku sira aprezenta sira nia lista kandidatura", nia esplika.

Iha enkontru hanesan ho jornalista sira, responsável hosi CNE fó sai aspetu sira seluk hosi preparativu sira ba eleisaun sira, liuliu katak hala'o hela iha munisípiu timoroan oioin kampaña sosializasaun ida kona-ba votu.

Resenseamentu iha Timor nia laran no iha estranjeiru hala'o hela mós, destaka susesu hosi prosesu ida hosi rejistu móvel iha Reinu Unidu ne'ebé halo ona ema timoroan hamutuk na'in 500 resin halo ona resenseamentu iha loron hirak ikus ne'e.

SAPO TL ho Lusa