DILI, (TATOLI) – Dekanu
Fakuldade Ekonomia no Jestaun (FEJ) Universidade Nasionál Timor Lorosa’e
(UNTL), Fernando Baptista Anuno, hatete setór turizmu esensiál tebes, maibé
poblema boot ne’ebé Timor-Leste enfrenta mak infraestrutura bázika mezmu balun
responde ona.
“Mina tempu ida sei maran mas ita
ko’alia kona-ba turizmu presiza identifika nia potensionalidade. Depois de ita
restaura ita-nia independénsia kada ministériu iha ona programa tuir planu
estratéjiku dezenvolvimentu nasionál, ho programa ne’ebé iha Governu foun mai
kontinua. Ita haree ba interese nasionál mezmu asuntu balun liga ho polítika
mas haree ba objetivu prinsipál mak mai responde povu nia preokupasaun”,
Fernando hatete iha Kampus Rezende, UNTL, ohin.
Nune’e importante atubele haree
ba setór agrikultura, turizmu, rekursu minerál, edukasaun, saúde,
infraestrutura hodi responde nesesidade povu. Bainhira hatán ona mak povu
ida-idak sei buka nia dalan nune’e neineik ba beibeik hanesan kompromisu ne’ebé
hato’o husi forsa polítika sira katak atu hasai povu husi ki’ak.
“Ho esperansa boot liuhusi
períodu ne’ebé mak ita-nia Governu tenta rezolve fronteira marítima nune’e bele
dada gazodutu mai Timór no kontinua diversifika atividade ekonómika naun
petrolíferu atubele substitui, nune’e ita-nia rendimentu la’ós mai husi mina
de’it mas husi turizmu, agrikultura, indústria hodi responde dezenvolvimentu
ekonómiku”.
Timor-Leste, nasaun ida lokalizada
iha Ázia ne’ebé mak iha nia kultura, ambiente, eransa kona-ba istória
rezisténsia ne’ebé úniku no tenke esplora, entantu ekonomia país ne’e depende
de’it ba minarai no gás.
Dekanu ne’e husu atu líder sira
tuur hamutuk hodi rezolve kestaun refere atu nune’e dezenvolvimentu iha setór
hotu bele la’o bá oin.
Estudante FEJ, Amelito da Costa,
bainhira observa ekonomia país nian hatete munisípiu balun iha produtu lokál
ne’ebé potensiál tebes, maibé tanba kondisaun estrada nune’e difikulta atu bele
asesu ba merkadu.
“Partidu A ka B mak sa’e mós
importante mak dezenvolvimentu tenke la’o”.
Jornalista: Maria Auxiliadora | Editora:
Rita Almeida
Imajen: Google.
Sem comentários:
Enviar um comentário