Segunda-Feira Ha’u Simu Pose

DILI, (TATOLI) – Eis Vice Xefe Estadu Maiór, Brigadeiru Jenerál Filomeno Paixão informa katak, nia sei simu pose iha loron segunda-feira (09/06) nu’udar ministru Defeza ba governu da-ualu ne’ebé lidera hosi Eis jenerál Taur Matan Ruak.

“Ha’u toma pose ho ministru seluk iha Segunda-Feira,” Filomeno Paixão informa ba jornalista sira hafoin hasoru malu ho Primeiru-Ministru (PM), Taur Matan Ruak  iha Palásiu Governu, ohin.

Filomeno informa nia sei implementa buat balun (la temi saida los) ne’ebé governu anterior lá konsege alkansa, liu-liu oinsá mak implementa planu ida hodi hatán ba nesesidade forsa sira no konsolida buat ne’ebé iha ona, inklui tempu hanesan mós revee fila fali estratéjia sira kona ba Forsa Defeza Timor-Leste nian.

“Ita halo fali revizaun, hare ida ne’ebé tuir ita nia forsa, ita nia is no ita nia hakarak, ita reeve mais ou menus tinan ida, hanesan hotu ona no ita fó sai fali estratéjia militár foun,” Paixão promete.

Tuir nia planu estratéjiku ne’ebé iha ona, ladún objetivu ona. Tempu muda ona, tanba ne’e presiza mós muda estratéjia foun.

Enkuantu bainhira atu halo konseitu estratéjia militár foun no troka ida iha ona ne’e tenke hare  konseitu defeza no seguransa ne’ebé antes ne’e  governu aprova ona liuhosi reuniaun konsellu ministru.

Iha esperansa ba agora ba oin servisu defeza no seguransa sei di’ak liu tan, la’ós tanba ministru foun di’ak liu ida uluk, maibé tanba ministru foun inteiradu liu iha problema passadu, entaun halo possíveis atu bele konvense konsellu ministru konaba nesesidade foun ne’ebé presiza ba FFDT.

Entretantu, iha loron 22 Novembru 2016 liuhosi reuniaun konsellu ministru VI governu konstitusionál ne’ebé lidera husi eis Primeiru-Ministru, Rui Maria de Araújo aprova ona konseitu estratéjiku konaba defeza no seguransa.

Haktuir iha pájina ofisiál governu, proposta husi  ministériu defeza ne’e hanesan dokumentu ida ne’ebé define aspetu fundamentál husi estratéjia globál Estadu nian atu kumpre objetivu sira husi Polítika defeza nasionál, iha kuadru polítika seguransa nasionál nian.

Nune’e mós iha konsulta ho Xefe Estadu-Maiór-Jenerál FALINTIL-Forsa Defeza Timor-Leste nian ba elaborasaun dokumentu ne’e, ne’ebé maka debate ona iha governu nia laran no mós ho Prezidente Repúblika, ho Konsellu Superiór Defeza no Seguransa nian nó mós Parlamentu Nasionál, tuir kompeténsia konstitusionál ida-idak nian.

Dokumentu ne’e aprezenta mós ba organizasaun sosiedade sivíl nian sira. Konseitu estratéjiku defeza no seguransa Timor-Leste, dahuluk avalia knaar no funsaun husi instituisaun Defeza no Seguransa Estadu nian, no lansa siklu foun ida konaba planeamentu estratéjiku nasionál, ho efeitu ba tinan sanulu mai ne’e.

Jornalista: Julia Chatarina | Editór: Manuel Pinto

Imajen: Primeiru Ministru, Taur Matan Ruak ko’alia ho Eis Vice Xefe Estadu Maiór, Brigadeiru Jenerál Filomeno Paixão