RDDU | Husu líder polítiku sira atu promove dialogu

Rede Defensór Direitus Umanus (RDDU)

Komunikadu Imprensa | Dili, 14 Agostu 2018

Rede Defensor Direitu Umanus: husu líder polítiku sira atu promove dialogu ka aprosima tribunál hodi hakotu impase polítiku atuál

Rede Defensor Direitus Umanus (RDDU) kompostu husi organizasaun Sosiedade Sivíl sira ne’ebe tau matan ba asuntu direitus umanus. Rede ne’e nia ezistensia hodi halo monitorizasaun no advokasia ba kazu violasaun direitus umanus, ne’ebé akontese iha Timor-Leste.

Rede Defensor Direitus Umanus (RDDU) avalia no akompaña ho kuidadu dezenvolvimentu situasaun polítika ne’ebé la’o hela iha Timor-Leste no konsidera nú’udar risku ne’ebé bele hamosu inestabilidade, liuliu inestabilidade ekonomia, sosiál, polítika no seguransa ne’ebé sai nu’udar direitu integrál hosi direitu umanus ne’ebé potensialmente bele afeita povu nia moris loron-loron, bainhira la iha solusaun ba situasaun impase polítiku atuál.

Tanba ne’e maka Rede Defensor Direitus Umanus, apela ba lideransa nasionál no lideransa partidu politiku sira, atu promove dialogu no komunikasaun polítika ne’ebé intensive liuhosi buka kolia ba malu no hases diverjensia polítika, odio no vingansa, ne’ebé la útil ba povu, nune’e hakotu imediata impase polítika ne’ebé ate agora seidauk iha nia solusaun.

Rede Defensór Direitus Umanus hakarak husu ba orgaun soberania sira atu bele hala’o ida-idak nia kna’ar tuir prinsipiu separasaun poder ne’ebé define iha artigu 69 Konstituisaun Repúblika Demokrátika Timor-Leste.

Impase polítika ne’e, nu’udar kauza nasionál ida ne’ebé bele impede funsionamentu makina estadu nia tomak, prejudika prosesu dezenvolvimentu nasionál nomos povu ninia ekonomia iha baze tanba la iha Orsamentu Jerál Estadu nian, ne’ebé sirkula hodi sustenta kna’ar ajente (autóridade) estadu nian, hodi hatan ba nesesidade povu no nasaun nian.

Hare’e ba situasaun polítika ne’ebé agoara dadaun la’o hela ne’e, Rede Defesór Direitus Umanus-RDDU rekomenda ba:

1. Prezidente da Repúblika Exelénsia Sr. Francisco Guterres “Lu-Olo” nu’udar Xefé Estadu, símbulo no garantia independensia nasionál no unidade Estadu nian no instituisaun demokrátiku sira nia funsionamentu regular sira atu buka solusaun ida ne’ebé di’ak, liuhosi dialogu hodi hakotu impase polítika atuál atu la hatuur povu no interese estadu iha risku;

2. Governu VIII Konstitusionál, ne’ebé lidera husi Sr. Primeriu Ministru, Taur Matan Ruak atu buka solusaun liuhosi komunikasaun no dialogu intensiva ho Prezidente da Repúblika, nune’e bele hakotu impase polítika ne’e;

3. RDDU husu ba Koligasaun Aliansa Mudansa ba Progresu (AMP) no Primeriu Ministru (PM), Sr. Taur Matan Ruak, atu buka aprosimasaun legál no lejítimu hosi Supremu Tribunál Justisa (STJ) atu deside “polemika kompetensia” kona-ba nomeasaun membru governu nian ne’ebé kontinua iha inserteza nian laran. Bainhira STJ konklui no deside katak Prezidente Repúblika iha kompetensia atu rejeita kandidatu membru governu hirak ne’e, PM tenke subtitui lista pendente sira ne’e ho lista membru governu foun. Maibé sé STJ mak deside katak rejeisaun ne’e ba kandidatura membru governu hirak ne’e la partense ba Prezidente Repúblika nia kompetensia, Prezidente Repúblika iha dever konstitusionál atu fó pose ba membru governu hirak ne’e;

4. RDDU mós husu ba Supremu Tribunál Justisa (STJ) atu uja ninia kompetensia konstitusionál hodi halo apresiasaun no fó solusaun atu hakotu polemika, kompetensia sira ne’e no evita desizaun ne’ebé buka atu ses-an ba “zona aman” ho desizaun “indefere” ka haruka fila-fila ba polítiku sira atu rezolve. Iha estadu direitu demokrátiku sira, bainhira polítiku sira la iha ona meius polítiku atu fó solusaun ba kestaun polítika no konflitu intrepetasaun ba asuntu nasionál ruma entre orgaun soberanu sira, tribunál mak nu’udar opsaun no meius ikus liu atu hakotu polemika hirak ne’e.

Membru RDDU:

1. Asosiasaun HAK
2. ALFeLa
3. AJAR
4. Acbit
5. Codiva
6. FundasaunMahein (FM)
7. AHMDTL (Asosiasaun Halibur Matan Defisiénsia Timor-Leste)
8. Belun
9. JSMP
10. CBRN-TL

Dili, 14 Agostu 2018

                                                                       

Koordenadora RDDU

Dra. Laura Afonso de Jesus

Rede Defensór Direitus Umanus (RDDU)
Rua: Faról, Dili Karaketu, Timor-Leste
Telefone (+670) 77139641 / 77259858