FRETILIN konsidera veteranu RAEOA la eduka povu

Deputadu bankada FRETILIN, Fabião Oliveira, konsidera, deklarasaun atu hasai Prezidente Rejiaun Administrativa Espesial Oecusse-Ambeno (RAEOA), Mari Alkatiri, ne’ebé hala’o iha semana kotuk husi veteranu RAEOA ne’e la eduka povu.

“Foin dadauk iha grupu ne’ebé em nome veteranu Oe-cusse ne’ebé fó sai deklarasaun atu duni sai Marí Alkatiri hanesan Prezidente ZEESM, atitude ida hanesan ne’e inmoral, tanba kuandu grupu ne’e hatene dehan sira veteranu, tenke respeitu ema ida ne’ebé mak hahú hatene prosesu luta libertasaun ba rai ida ne’e, tanba ita hotu tenke respeita líder hotu, la’os hasai liafuan sira ne’ebé iha deklarasaun duni líderansa sira,” kestiona deputadu Fabião Oliveira liu hosi plenária, Segunda (13/08/2018).

Deputadu opozisaun ne’e afirma, prezensa Marí Alkatiri iha Oe-cusse hodi lidera Zona Espesial Ekonomia Sosial Merkadu (ZEESM) la’os tanba hakarak rasik, maibe tanba apoia husi konsensu polítika ida.

Iha biban hanesan, deputadu bankada PUDD, António de Sá Benevides, rekomenda ba veteranus RAEOA, atu tau an didi’ak hodi labele halo aktu ne’ebé ladi’ak hasoru líderansa sira, tanba troka líderansa iha fatin ida, la’os atu rezolve buat hotu.

“Ha’u-nia sujestaun ba veteranu sira iha Oe-cusse, hanoin hotu-hotu tenke tau an para ita bele kontribui di’ak liu ba ita nia nasaun, atu hatun no hasai ema ne’e la’os kestaun fundamental,” hateten António de Sá.

Tuir deputadu PUDD ne’e, veteranu iha direitu atu kestiona, maibe la’os ho dalan hanesan ne’e, tanba buat hotu la’o tuir lei.

 “Ha’u hanoin ne’e direitu absolutu veteranu sira nian atu kestiona, maibe atu hatun Marí Alkatiri ne’e la’os buat ida ne’ebé ita hotu hakilar, buat hotu la’o tuir nia lei, Marí mós halo buat barak iha ne’eba, se ita hakarak hasai lei fó dalan, buat hotu tuir nia dalan, ho konsensu buat hotu ita bele halo,” dehan deputadu António.

Hatan ba preokupasaun ne’e, Ministru Reforma Lejislativa no Asuntu Parlamentar (MRLAP), Fidelis Magalhães, hateten, Governu sei esforsu atu realiza kompromisiu sira ne’ebé hala’o ona durante kampaña eleitoral ba eleisaun antesipada.

Antes ne’e, liu hosi kampaña eleitoral, Prezidente PLP, atual Primeiru Ministru, Taur Matan Ruak, iha nia kompromísu polítiku ba eleitor sira katak, sei hasai Prezidente ZEESM husi Oe-cusse bainhira AMP kaer ukun iha períodu 2018-2022.

Antes ne’e, antigu kuadru rejistensia, no  veteranu libertasaun nasional, Rejiaun Administrativa Espesial Oe-cusse Ambeno (RAEOA), husu ba Primeiru Ministru (PM), Taur Matan Ruak, atu hapara Prezidenti Autoridade Oe-cusse, Mari Alkatiri ho nia estrutura tomak husi Oe-cusse urjenti, tanba durante Alkatiri nia prezensa tinan hira ona iha Oe-cusse, halo povu atoni tristi no sai vítima ba nia desizaun sira hotu. Say

GMN TV | Grupo Média Nacional