Governu timoroan define limite dolares millaun 1,35 ba Orsamentu tinan 2019

Governu timoroan aprova iha loron-sesta ne'e limite orsamental ida hamutuk dolares millaun 1,35 ba Orsamentu tinan 2019 nian, ne'ebé maka tenki submete ba Parlamentu too loron 08 Novembru, informa ezekutivu ne'e.

Desizaun konabá limite másimu ba gastu sira ba Orsamentu Jeral Estadu nian (OJE) ba tinan oinmai halo iha reiniaun estraordinaria ida Konsellu Ministru nian, ne'ebé maka analiza posivel planu sira oioin ba limite orsamental ne'e, preparadu hafoin debate iha semana ida nian laran.

Aleinde planu sira, ne'ebé aprezenta hosi ministra Finansas em ezersisiu, Sara Lobo Brites, ezekutivu ne'e mós apresia kalendariu preparasaun no prioridade nasional sira ba OJE tinan 2019.

Semana ne'e, hafoin ronda debate preliminar ho membru sira Governu nian, primeiru-ministru, Taur Matan Ruak, difini hanesan objetivu orsamentu nasaun nian ba tinan oin maka kombate kiak liu hosi diversifikasaun ekonómika.

Entre objetivu prinsipal sira planu ba mandatu Governu nian ba tinan lima oinmai maka hanesan hamenus kiak ba 10%, kria postu serbnisu sira foun rihun 60 no "diversifika ekonomia", ne'ebé maka kontinua depende ba petroleo.

Limite ne'ebé aprovadu iha loron-sesta ne'e maka ass liu entre tolu ne'ebé propós, ne'ebé maka varia entre billiaun 1,1 no billaun 1,35.

Debate konabá gastu sira no aumentu reseita sira laos petrolifera, inklui mós liu hosi reforma fiskal, sai mós hanesan prioridade seluk ne'ebé definida.

Ministra Sara Lobo Brites, hatete katak konta sira ba tinan 2019 "asenta iha prinsipal prinsipiu lima", liuliu "sustentabilidade fiskal, foku iha prioridade nasional sira, rasionalizasaun gastu sira, kapasidade ezekusaun nian no kapasidade ekonomika hodi absorve orsamentu".

Debate konabá OJE tinan 2019 halao bainhira se hein hela desizaun ida Prezidente Republika, Francisco Guterres Lu-Olo nian, konabá Orsamentu tinan 2018 nian, aprovadu ho forma urjente hosi Parlamentu Nasional no haruka iha loron 10 Setembru ba xefe Estadu.

Hanesan saida maka anunsia iha loron-kinta ne'e, primeiru-ministru, governante sira aprova iha loron-sesta ne'e katak kontinua aplika rejime duodesimu, ne'ebé maka vigora dezde loron 01 Jeneiru, durante fulan Setembru, "ho forma hodi asegura pagamentu salariu sira no despeza sira seluk".

Taur Matan Ruak informa tiha ona ba jornalista sira iha loron-kinta ne'e katak Governu iha konta Tezouru nian besik dolares millaun 80, sufisiente ba makina Estadu nian.

Fundu sira iha Tezouru resulta hosi osan restu sira ne'ebé foti hosi Fundu Petrolíferu iha fulan Agostu, ho dolares millaun 140 - hodi selu gastu sira referente ba fulan Jullu no Agostu - no reseita sira laos-petrolifera adisional ho dolares millaun 35 resin.

Durante reuniaun loron-sesta ne'e, Governu analiza mós akordu ida ho Japaun ba kooperasaun ekonomika iha ámbitu subvensaun Ajénsia Kooperasaun Internasional japaun nian (JICA) "projetu ba bolsa de estudu sira ba dezenvolvimentu rekurusus umanus nian", ne'ebé koñesidu hanesan JDS.

"JDS hanesan programa ida kooperasaun japoneza ne'ebé hahú iha tinan 1999, ne'ebé maka implementadu iha nasaun 15 ho objetivu atu apoia dezenvolvimentu rekursu umanu. Membru sira Governu nian debate konabá politika implementasaun nian, programasaun no áreas prioritária estudu programa nian tuir prioridade nasional", refere komunikadu ezekutivu nian.

Aprova mós asinatura akordu ida ho Japaun ba atividade sira edukasaun nian no formasaun iha área sira asisténsia teknika umanitaria no operasaun ba asisténsia karik iha katastrofe ruma.

SAP TL ho Lusa