Timor-Leste Hadi’a Klasifikasaun Globál Kona-ba Dezenvolvimentu Umanu

DILI, (TATOLI) –Timor-Leste hetan ninia progresu iha ninia klasifikasaun husi Indise Dezenvolvimentu Umanu (HDI-sigla inglés), ne’ebé lansa husi Programa Nasaun Unida ba Dezenvolvimentu Umanu (PNUD) fulan ida ne’e hanesan medida dezenvolvimentu ekonómiku no bem estar inklui saúde, edukasaun no rendimentu iha nasaun 189 iha teritóriu, fó sai relatóriu PNUD.

Tuir relatóriu ne’e, nasaun aumenta ninia klasifikasaun HDI husi fatin ida ba 132, kompara ho 133 iha HDI iha 2016. Ida ne’e tau Timor-Leste ba iha kategória “Dezenvolvimentu Umanu Médiu” hamutuk ho nasaun Ázia-Pasífiku sira seluk, inklui Repúblika Demokrátika Populár Laos, Banglades  no Kambodia.

Média espetativa moris iha Timor-leste aumenta ba 69.2, enkuantu Gross National Income(GNI) per kapita aumenta dolár 6,846 no proporsaun joven sira ne’ebé dezempregu tun ba porsentu 11,6.

Alende  ne’e, persentajen GDP ne’ebé aloka ba despeza saúde nian sa’e ba porsentu 3.1. Númeru idade eskola nian no rejistrasaun nível eskola sekundária nian aumenta oituan durante périodu tinan lima liubá.

“Tendénsia jerál iha Timor-Leste maka kontinuasaun atu hadi’a rezultadu dezenvolvimentu umanu, ne’ebé sei apoiu Timor-Leste hodi loke populasaun joven sira-nia poténsia”, hateten PNUD Timor-Leste Country Director, Claudio Providas, liuhusi komunikadu, diriji ba TATOLI, ohin.

Maske nune’e, tuir nia, redusaun iha investimentu públiku iha tinan 2017-2018, iha poténsia atu prejudika liutan, nune’e iha subkonsekuénsia ba lukru dezenvolvimentu.

“Joven dezempregu kontinua enfrenta vulnerabilidade oioin no sei la liu alvu no kualidade ne’ebé iha saúde, edukasaun no ekonomia, Timor-Leste bele lakon oportunidade únika ida ne’e to’o ninia dezenvolvimentu ne’ebé potensiál ba decade balun oin mai”.

Kestaun seluk, tuir PNUD, tenke iha konsiénsia kona-ba oportunidade ne’ebé iha, progresu no kbiit entre feto no mane. Iha Timor-Leste HDI ba feto menus liu mane nian, tanba rendimentu no edukasaun feto nian ne’ebé menus liu.

Relatóriu Dezenvolvimentu Nasionál Timor-Leste hetan katak iha investimentu la adekuadu iha edukasaun no treinamentu ba grupu juventude sira ne’ebé dezempregu, ne’ebé sente la preparadu ba no falta abilidade nesesáriu ba asesu serbisu ne’ebé di’ak. Ida ne’e intensifikasaun ba juventude feto no feto foinsa’e ne’ebé iha desvantajen liu atu partisipa loloos iha edukasaun no ekonomia tanba papel jéneru.

Timor-Leste mak nasaun joven liu iha mundu ho pursentu 74 husi populasaun ne’ebé ho idade 35 anos ba kraik, sai hanesan foinsa’e daruak iha rejiaun Ázia-Pasífiku depois Afeganistaun, no globalmente joven liu ba dala 15. Tanba ne’e, joven sira iha potensialidade boot atu hala’o sira-nia kna’ar importante hodi realiza nasaun ne’e nia aspirasaun ba futuru dezenvolvimentu.

Rejiaun Ázia-Pasífiku rejista segundu kresimentu aas liu iha HDI ho pursentu 41.8 entre tinan 2017. Maibé bainhira ajusta ba dezigualidade, nia esperiénsia lakon porsentu 15.6 iha HDI.

“Nível médiu HDI iha nasaun menus dezenvolvidu sa’e to’o pusentu 51 dezde tinan 1990, refleta katak ema nia vida naruk, sira adekuadu liu no hetan rendimentu boot liu. Maibé, iha nafatin diferensa ne’eb’e masivu iha mundu ne’e iha ema nia moris di’ak,” refere komunikadu PNUD.

Jornalista: Rafy Belo

Imajen: Joventude ida tur hein hela Bandeira Nasional no bandeirola Timor Leste nian neebe faan iha area estrada ibun kampung Alor Dili, 15 Maiu 2017. Aktividades joven no labarik sira faan Bandeira no bandeirola nee akontese wainhira ita atu komemora loron Nasional Timor Leste nian. Foto TATOL