KM Aprova Tetu Orsamentál 2019 Hamutuk Biliaun $1.350

DILI, (TATOLI) –  Governu liuhosi reuniaun estraordinária Konsellu Ministru (KM) Sesta ne’e, aprova ona tetu orsamentál ba tinan fiskál 2019 ho montante biliaun $1.350, ne’ebé antes ne’e Ministériu Finansas (MF) aprezenta ona iha jornada orsamentál foin lais ne’e.

Ministru Estadu Prezidénsia Konsellu Ministru, Agio Pereira informa KM ohin halo reuniaun estraordinária, hodi hare konaba asuntu importante.

“Iha jornada orsamentál ita rona ekipa téknika Ministériu Finansas konaba perspectiva ba orsamentu jerál estadu (OJE) ba tinan 2019, iha ne’ebá la aprova buat ruma tanba tenke liuhosi Konsellu Ministru, ne’e mak aprova tetu OJE 2019 hamutuk biliaun $1.350, ita aprova opsaun datoluk”, katak ba jornalista sira iha Palásiu Governu hafoin remata reuniaun ezekutivu.

Entretantu iha jornada orsamentál ne’ebé realiza foin lais, ekipa tékniku sira aprezenta senáriu tolu ba orsamentu 2019, senáriu ki’ik liu mak biliaun $1.1, médiu mak biliaun $1.218 no senáriu ass liu mak biliaun $1.350, maibé seidauk iha desizaun momentu ne’ebá tanba tenke liuhosi reuniaun KM.

Tuir aprezentasaun ne’e, tetu orsamentál ne’e bele utiliza hanesan plafon ofisiál ba orsamentu 2019 nian no tuir lei orsamentu no jestaun finanseira, iha loron 15 Outubru 2018 tenke halo ona submisaun ba Parlamentu Nasionál (PN), maibé ho sirkunstánsia ne’ebé iha MF sei halo ezersísiu hodi halo projesaun ida.

Ministru Agio akresenta, konaba governu orsamentu 2019 aprezentasaun iha PN, ne’e liu prosesu naruk tanba ne’e ohin KM mós aprova dezagregasaun ba ministériu sira, hafoin MF ho tékniku sira sei prepara livru verde ne’ebé fahe detalladu orsamentu no sei hodi tan ba KM no sei submete ba komisaun revizaun polítika orsamentál, hafoin KM submete iha PN no iha ne’ebá PN sei iha opiniaun rasik tanba ne’e hanesan proposta husi governu.

Alende ne’e, governante ne’e informa KM mós diskute mós konaba demora promulgasaun no publikasaun orsamentu jerál estadu (OJE) 2018 husi Prezidente Repúblika (PR), tanba ne’e fulan Setembru governu tenke kontinua ho rejime duodecimal.

“Osan ne’e iha ona, osan ida liuhosi Parlamentu Nasionál hodi autoriza levantamentu estraordinária husi Fundu Petrolíferu hamutuk millaun $140, agora sei iha resin millaun $80 atu uza ba rejime duodecimal hodi aplika ba fulan ida ne’e, ida ne’e importante tebes tanba iha sasán urjente balun ne’ebé mak ita tenke selu”, katak.

Iha reuniaun ohin mós membru governu sira diskute konaba kalendáriu preparasaun no prioridade OJE 2019 no dokumentu sei submete iha loron 8 Novembru 2018.

Jornalista: Julia Chatarina | Editór: Manuel Pinto

Imajen: Ministru Estadu Prezidénsia Konsellu Ministrus Hermenegildo Augusto Cabral Pereira. Imajen António Goncalves