DILI, (TATOLI) – Diretór
Grupu Pelican Paradise, Datuk Edward Ong, akompaña hosi Diretór Ezekutivu Trade
Invest Timor-Leste, Arcanjo da Silva, hasoru Prezidente Repúblika, Francisco
Guterres Lú Olo.
Soru-mutu ne’ebé hala’o iha
Palásiu Prezidente Nicolau Lobato, Bairru Pité, sesta ne’e ho objetivu relata
ba Xefe Estadu kona-ba prosesu investimentu ne’ebé Grupu Pelican Paradise sei
halo iha área Tasi Tolu, ne’ebé tuir planu sei okupa rai ektare 554.
Investimentu ho totál osan Dolar
Amerikanu 700.000.000 ne’ebé nia prosesu hahú kedas iha 2008 ne’e, sei harii
otél ida ho fitun lima iha Tasi Tolu, Sentru Komersiál ida, Kampu Golf, Eskola
no Ospitál ho padraun internasionál, Sentru Dezenvolvimentu Juventude inklui
reflorestasaun ba foho-lolon ektare 350 iha Tasi Tolu.
Tuir Datuk Edward Ong, atu hahú
projetu ne’e sira presiza akordu espesiál investimentu ho Governu Timor-Leste
hodi haree pontu lubuk ida, liu-liu relasiona ho lei, aspetu sosiál-ekonómiku,
ambientál no oinsá atu hasai ema hamutuk 1.800 resin ne’ebé oras ne’e okupa
hela área ne’ebé sei implementa projetu refere.
Iha faze konstrusaun projetu ne’e
sei presiza traballador hamutuk ema 1.500 no sei emprega progresivamente ema
iha kada tinan.
Iha biban ne’e, Diretór
TradeInvest Timor-Leste, Arcanjo da Silva, hatete ezbosu akordu espesiál
Investimentu entre Grupu Pelican Paradise ho Governu kompleta ona no hein de’it
aprezenta ba Konsellu Ministru liu hosi ministériu kompetente.
Entretantu, Prezidente Repúblika,
Francisco Guterres Lú Olo, enkoraza Grupu Pelican Paradise ne’ebé investe ona
iha Timor-Leste no husu atu kolabora di’ak ho Governu, iha implementasaun
projetu sira ne’e.
Xefe Estadu mós hameno atu
investimentu sira ne’ebé grupu ne’e halo, bazea ba regra no la’o tuir lei
ne’ebé vigora iha Timor-Leste.
Jornalista: Xisto Freitas | Editora:
Rita Almeida
Imajens: 1 – Projetu Pelikan; 2 -
Grupu Pelican Paradise hasai foto hamutuk ho Prezidente Repúblika, Francisco
Guterres Lú Olo. Imajen Mídia PR
1 comentário:
Hanesan Diretór antesesor DNTPSC / Ministerio Justiça iha Tinan 2008 (IV Governu Konstitusionál) no atual Deputado Eleito iha V Legislatura, ne'ebe uluk akompaña direta iha prosesu levantamentu dadus husi terrenu hodi hamosu mapamentu fiksu ne'ebe hau ràsik maka asina hó objetivu katak hakarak haré dejenvolvimentu refere nia realidade. Husi akompañamentu durante tinan hirak nia laran saeda maka akontese :
1. Mapamentu nebe uluk hau asina Rai
sei mamuk hela;
2. Agora ita nia populasaun tama
hodi hela iha rai refere (Atitude
povu ne mós tambà ejijénsia moris
hodi hala'o perigrinasaun);
3. Momentum ne'eba kedas hau sempre
koalia ba Superior sira fó
hanaoin oinsá asegura fatin né.
Maibe hotu hotu sibuk oinsá maka
asegura pojisaun nungka iha
hanoin ne'ebe vijioner;
4. Situasaun no kondisaun agora sai
oin sekuk no komplikadu liu tàn;
5. Loron ba loron uma mos aumenta ba
bebeik (Tamba terpaksa);
Iróniku mós ba Companhia Pelican Paradise ne'ebe uluk mai hasoru hau no hau hateten kedas ba sira momentum depois asina kontratu iha Palasio Givernu, karik bele emi halo esforsu bok'an ona hahú komesa tamba rai ne seu mamuk hela. Sira konkorda no dehan iha tempu badak ami hahú ona. Depois de atan hau husik postu Chefia fila fali nudar ofisiais bain bain, nemós sempre akompaña situasaun refere maka hanesan :
* Governu laiha planu oinsa atu
asegura objetu refere hó meius
oinsá ida ne laiha;
* Companhia Pelican Paradise Tinan
Tinan hafuhu Presidente foun no
Governu foun nia mai fali ona ho
nia aprejentasaun rebo rebo;
* Companhia Pelican Paradise koalia
maka barak but (No Action);
Haré ba buat hirak ne hotu maka nu'udar Deputadu atan hau atu fó hanoin ba Estadu hodi haré didíak buat tuir mai :
* Presija husu didíak Companhia
Pelican Paradise nia seriedade;
* Oinsa hala'o tratamentu ne'ebe
dignu ba populasoens nebe hela iha
rai nia leten.
* Karik dejenvolvimentu ne lao duni
oinsa Governu buka meius hala'o
realokasaun ho dignidade no
responsabilidade;
* Laiha dalan seluk selain servisu
hamutuk.
Hein katak ba oin buat hotu sei lao tuir regras nebe vigora.
Bem haja Timor Leste.
Enviar um comentário