PR NOMEIA KORONÉL COLIATI BA XEFE ESTADU-MAIÓR F-FDTL

Presidência da República Democrática de Timor-Leste

KOMUNIKADU IMPRENSA

Dili, 27 Outubru 2018

PREZIDENTE da REPÚBLIKA NOMEIA KORONÉL COLIATI BA XEFE ESTADU-MAIÓR F-FDTL

Palásiu Prezidente Nicolau Lobato, loron-27 fulan-Outubru, Prezidente-da-Repúblika, Francisco Guterres Lú Olo, ho proposta husi Governu no hafoin rona tiha Xefe Estadu-Maiór Jenerál Forsas Armadas no Konsellu Superior Defeza no Seguransa, nomeia Koronél Calisto Santos Coli “Coliati” nu’udar Xefe Estadu-Maiór FALINTIL- Forsa Defeza Timor-Leste, liuhusi dekretu Prezidente-da-Repúblika no 45/2018, loron-23 fulan-Outubru.

Haree ba importansia iha instituisaun no funsaun iha estrutura militar, Prezidente-da-Repúblika konsidera nesesáriu tebes atu prenxe kargu Xefe Estadu-Maiór ne’ebé oras ne’e mamuk, hafoin nomeasaun Xefe Estadu-Maiór F-FDTL sesante, Brigadeiru-Jenerál Domingos Raul “Falur Rate Laek” ba kargu Vise-Xefe Estadu-Maiór Jenerál Forsas Armadas liu husi Dekretu Prezidente-da-Repúblika no 39/2018, loron-21 fulan-Setembru.

Koronél Coliati sei hala’o knaar ida ne’e durante tinan-rua, hahú husi data simu posse, ne’ebé sei realiza iha loron-29 fulan-Outubru, tuku 10:00 OTL, iha Palásiu Prezidente Nicolau Lobato.

Xefe Estadu-Maiór F-FDTL, hamutuk ho Vise-Xefe Estadu-Maiór Jenerál Forsas Armadas, sei fó asisténsia ba Xefe Estadu-Maiór Jenerál Forsas Armadas hodi hala’o nia funsaun no dirije Estadu-Maiór Koordenadór Konjuntu.

Koronél Calisto Santos Coli “Coliati” antes ne’e asumi kargu nu’udar Adidu Defeza Timor-Leste ba Australia, hahú husi fulan-Juñu 2014 to’o fulan-Jullu 2018.

Nia moris iha loron-10 fulan-Agostu tinan-1959, iha suku Darulete, Postu Administrativu Liquiça, Muniçípiu Liquiça.

Rohan

Imajen: Koronél Calisto Santos Coli “Coliati”

Presidência da República Democrática de Timor-Leste - Facebook