sexta-feira, 16 de novembro de 2018

MAP Hasoru Difikuldade Distribui Fini Tanba Laiha Kombustivel


DILI, (TATOLI) – Distribuisaun fini husi Ministériu Agrikultura no Peska (MAP) liuliu Departamentu Fini ba asosiasaun agrikultór no povu agrikultór sira iha munisípiu hetan difikuldade tanba laiha kombustivel.

Xefe Departamentu Fini MAP, Fernando Soares, hatete normalmente iha tempu ida hanesan ne’e MAP fahe fini klase rua mak sertifikadu ne’ebé distribui ba asosiasaun produtór fini komersiál sira kada tinan ne’ebé responsabiliza direta husi Departamentu Fini.

“Ne’ebé ba daudaun ne’e distribui duni batar ba asosiasaun sira iha munisípiu Aileu, Ermera, Likisá balun depois Baukau no seluk ami esforsu hela, mas problema transporte ne’ebé limitadu tebes depois apoiu mina husi kompañia ne’e maka problema, entaun ami tenta atu distribui, duni tempu kuda, maibé situasaun difisil tebes”, Fernando dehan iha Komoro, ohin.

Fernando katak lahatene razaun saida maka empreza Borala la fornese mina ba MAP, maibé serteza katak ministériu lahetan mina husi kompañia, nune’e afeta tebes ba distribuisaun fini nian.

Kona-ba fini klase komersiál batar daudaun ne’e kompañia Panggeh Unip. Lda ne’ebé manán konkursu atu sosa fini husi asosiasaun agikultór sira maka hahú ohin sosa depois rekolla ba armazein munisípiu ida-idak no husi ne’ebá maka distribui ba agrikultór sira.

“Ba tinan ida ne’e ita distribui fini (batar) tonelada 25. Klaru ida ne’e lato’o, maibé orsamentu ida ministériu aloka maka hanesan ne’e ona depois ita haree saida maka akontese tanba fini lato’o”.

Tanba distribuisaun fini ba tinan ne’e limitadu no atu responde ba nesesidade fini ba agrikultór sira, Fernando dehan loloos fini klase komersiál ne’e barak, maibé ida ne’e la’ós ministériu nian, mas asosiasaun nian.

“Entaun ba agrikultór sira ne’ebé baibain kada époka ita fó subsídiu ne’e dalan úniku ministériu bele iha adisionál balun bele ajuda, maibé kuandu laiha tanba ida ne’e komersiál sira ne’ebé presiza bele sosa direta iha asosiasaun kada munisípiu, maibé atu hetan subsídiu fini fora husi tonelada 25 ne’e lagarante”.

Aleinde batar MAP mós fahe hare tonelada 25, fore-rai tonelada 10, mas rezultadu teste laboratóriu foin mak hasai no loloos atu distribui hamutuk ho batar, maibé tanba difikuldade iha mina maka tarde hasai rezultadu laboratóriu no iha tempu badak maka fó sai no entrega ba asosiasaun agrikultór sira.

Kona-ba distribuisaun fini ba dauduan ne’e empreza ne’ebé manán konkursu ne’e maka rekolla fini iha kada asosiasaun no tau iha armazein munisípiu, maibé ida ne’e larezolve distribuisaun fini bainhira seidauk to’o iha agrikultór nia liman atu kuda tanba fini ne’e tau de’it iha armazein munisípiu ida-idak no MAP munisípiu maka sei fahe enkuantu kombustivel laiha no fini bele abandona de’it iha armazein.

Fernando relata iha 2017 ministériu fahe fini tonelada 50, maibé ba tinan ne’e iha de’it 25 no hanesan tékniku ne’ebé besik loos asosiasaun no agrikultór triste tanba fini lato’o maski fini barak loos maka kada asosiasaun prodús, maibé Governu laiha osan atu sosa fini sira ne’e.

Iha 2018 Governu sosa fini husi asosiasaun uitoan de’it tanba menus osan maski asosiasaun prodús fini barak tanba situasaun polítika ne’ebé país ne’e hasoru no iha tinan oin maka MAP tau osan atu sosa fini tonelada 140 ba hare no batar.

Jornalista: Maria Auxiliadora | Editora: Rita Almeida

Fini Batar. Foto/Google.

Sem comentários: