Lere Kondena Hahalok Defama Orgaun Soberania

DILI, (TATOLI) – Xefe Estadu FALINTIL-Forsa Defeza Timor-Leste (F-FDTL), Maiór Jenerál Lere Anan Timur, kondena hahalok timoroan balun ne’ebé defama orgaun soberania, liu-liu Prezidente Repúblika.

“Ita-nia nasaun pós konflitu, nasaun ida ne’ebé nurak maibé nu’udar nasaun ida direitu demokrátiku, ita tenke respeita malu”, eis-lider rezisténsia ba jornalista sira iha Palásiu Prezidente Nicolau Lobato, Bairru Pité, kuarta ne’e.

Nia haktuir dezde atuál Primeiru-Ministru nia tempu hanesan Prezidente Repúblika, ema balun muda imajen Prezidente Repúblika ba karikatura hanesan la’ós ema loloos no tolok.

“Ami nu’udar orgaun seguransa no defeza, ami tenke defende Prezidente Repúblika no Prezidente Repúblika sira seluk ne’ebé sei mai tanba orgaun aas liu iha nasaun ida ne’e”, akresenta Lere.

Nia afirma ne’e la signifika sira halo polítika partidária maibé halo polítika kona-ba estabilidade.

“Ba kestaun rua ne’e (polítika partidária no polítika kona-ba estabilidade), ami sei tuur hamutuk halo petisaun ba Parlamentu Nasionál no Governu ho intensaun atu fó atensaun ba situasaun rua ne’ebé ha’u aprezenta dadauk, tanba Timor ne’e hakarak estabilidade. Só estabilidade maka bele garante estabilidade”, afirma.

Tuir nia impase polítika ne’ebé timoroan sira atravesa dadauk, kompeténsia orgaun ida-idak ninian, liu-liu Prezidente Repúblika, Governu no Parlamentu Nasionál atu rezolve, maibé instituisaun seguransa no defeza nia obrigasaun maka atu tau-matan ba estabilidade.

Jornalista: Xisto Freitas | Editora: Rita Almeida

Imajen: Xefe Estadu Maiór FALINTIL-Forsa Defeza Timor-Leste (F-FDTL), Majór Jenerál Lere Anan Timur.Foto António Goncalves