Autor hosi masakre hasoru ema
musulmanu na'in 51 iha atake ida iha meskita rua iha Nova Zelándia iha tinan
2019 hetan ona kondenasaun, iha loron-kinta ne'e, ba prizaun perpétua lahó
direitu ba liberdade kondisional, hanesan kastigu dahuluk ne'ebé maka aplika
iha nasaun.
Australianu Brenton Tarrant,
tinan 29, hetan kondenasaun tanba akuzasaun hamutuk 51 hosi homisidiu, 40 tanba
tentativa oho nian no ida tanba terorizmu ba atake ne'ebé hala'o ho arma
semiautomátika sira iha loron 15 Marsu tinan liubá.
Tarrant transmiti parte balun
hosi atake liuhosi rede sosial sira. Masakre akontese iha meskita sira Al Noor
ho Linwood, iha sidade Christchurch, bainhira hala'o hela orasaun tradisional
loron-sesta nian.
Kastigu ne'e hato'o hafoin loron
tolu bainhira sobrevivente hosi atake na'in 91 no vítima sira nia família sai
hanesan sasin iha tribunal, hafoin Tarrant hatete tiha hanesan kulpadu hosi
akuzasaun sira hotu no desidi renunsia ba nia defeza.
Juís Cameron Mander hatete ona
katak Tarrant nia krimi sira hanesan aat tebes hodi moris tomak ida iha kadeia
sei labele kompensa, tanba hamosu ona lakon no triste maka'as ida, hosi
rezultadu hosi ideolojia distorsidu ho aat ida.
"Nia asaun sira hanesan la
humanu", Mander hatete. "Ita oho arbiru kosok-oan ida ho tinan tolu
bainhira nia hakohak metin nia aman nia ain", nia ilustra.
Tarrant despede advogadu sira ho
hatete ba juís katak lakohi ko'alia iha audiénsia. Advogadu ida ne'ebé tribunal
nomeia hatete ona ba juís katak Tarrant la kontra sentensa ida hosi prizaun
perpétua lahó liberdade kondisional.
Mander observa katak australianu
hatete foin lalais katak agora rejeita nia filozofia extremista no konsidera
nia atake sira hanesan "irasional ne'ebé aat tebes" maibé juís
defende katak sinseridade hosi mudansa hosi opiniaun hanesan kestionável no
katak Tarrant seidauk hatudu empatia ba vítima ka tristeza tanba saida maka nia
halo.
Iha Marsu, Tarrant deklara
hanesan kulpadu hosi akuzasaun 51 homisídiu nian, 40 ba tentativa oho nian no
terorizmu ida nian.
Sapo TL | Lusa
Sem comentários:
Enviar um comentário