CNRT Husu Pozisaun Taur, Ba Prosesu Dezenvolvimentu Greater Sunrise

DILI, STLNEWS.co -- Bankada CNRT husu pozisaun Primeiru Ministru, Taur Matan Ruak konaba prosesu dezenvolvimentu Greater Sunrise nian.

Tuir Xefe Bankada CNRT, Deputadu Duarte Nunes, afirma sei haree ba kestaun mina tanba Deputadu Adirano do Nascimento fo sai horisehik katak povu nia moris mak mina.

Liu husi Xefe Bankada CNRT ninia observasaun ba lider nain rua (Xanana-Alkatiri), pozisaun sira nee antagonika, ida hakarak ba Australia no ida hakarak dada kadoras mai Timor Leste, signifika pozisaun husi lider nain rua la hanesan.

Nia katak, mina nee riku soin povu nian, povu tenke hatene no povu nia hakarak mak ida neebe, se ita hotu la hatene ida ba Australia no ida dehan mai iha nee (Timor-Leste), nusa mak governu la organiza hodi husu ba povu nia hakarak saida loos, nunee mandatu neebe povu fo hotu-hotu kumpri mandatu nee.

“Se lae idak-idak hanoin ninian, entaun ida neebe maka loos. Tanba too agora hau seidauk rona husi Primeiru Ministru hanesan lider ida nia pozisaun too agora ita seidauk hatene. Husi nain rua nee ita hatene ona nunee bele iha solusaun,” Xefe Bankada CNRT levanta husi plenaria, iha ambitu debate OJE 2020 iha faze loron daruak, Sesta (02/10/2020).

Nia hatutan, bainhira Xanana no Alkatiri tuur hamutuk iha situasaun hanesan nee atu koalia saida konaba mina (Greater Sunrise) nee. Entaun ho situasaun hirak nee maka Xefe Bankada CNRT, Deputadu Duarte Nunes husu ba governu atu buka meiu oinsa hodi fo solusaun.

Suara Timor Lorosae | Reportajen: Natalina Lopes/Guilhermina Franco | Editor: Ekipa STL

Imajen: Xefe Bankada CNRT, Deputadu Duarte Nunes. (Dok: STL)