DILI, Suara Timor Lorosae - TIMORLESTE.com – Prezidente Republika (PR), Jose Ramos Horta hatete, komemorasaun 28 Novembru diak liu hametin rekonsiliasaun ho Republika Indonezia (RI).
Prezidente Republika Jose Ramos Horta hatoo kestaun nee ba jornalista sira bainhira remata vizita konventu Madre Alma iha Bebonuk, Segunda (25/11/2024).
Prezidente Republika hatete, loron proklamasaun independensia ba dala 49 neebe sei selebra iha Oekusi nee delegasaun boot husi Indonezia mai, bele iha novidade boot ida tan ba 28 Novembru.
“Maibe purtantu governu deside halo iha Oekusi, hau mos konkorda, uluk kedas Prezidente Autoridade João Gonsalves koalia ho hau, hau koalia ho maun boot Xanana, desizaun halo iha Oekusi. Primeiru ita selebra restaurasaun independensia laos festa deit, autoridade Oekusi sira inisiativa diak, feira ida neebe boot. Hau mos konvida eis jeneral sira mai hamutuk ho sira, ita hametin nafatin rekonsialiasaun. Rekonsilia rai laran, hametin rekonsialiasaun Indonezia diak liu tan, purtantu hau kontente ho programa neebe governu prepara iha Oekusi,” katak PR Horta.
Oinsa Prezidente Republika nia haree iha selebrasaun proklamasaun Indepedensia ba dala 49, no oinsa PR nia haree kona-ba dezenvolvimentu iha Timor Leste, hatan ba kestaun nee Xefe Estadu hatete, agora iha mudansa boot.
“Independensia ba dala 49, hau hatete deit nunee, 2022 ita iha Timoroan doutoradu ida deit, agora atus ida resin, uluk mediku 19, agora mill duzentus. Uluk eletrisidade iha Dili mos araksa agora 97% territoriu, uluk ita haree Dili laran oras tuku 07 too 08 deit mate, ita ba foho Baukau neebe-neebe atividade laiha liu agora atividade barak loos, buat barak diak, ema moris naruk liu, tanba uluk Timoroan ida moris nia konforme espetativa moris menus 60 idade agora moris too 70 idade,” katak Horta.
Xefe Estadu hatete, Purtantu buat barak diak, podia diak liu tan, maibe iha governasaun nunee duni, laos buat hotu-hotu susesu, barak hetan susesu, barak seidauk, hadia demokrasia metin nafatin, tanba demokrasia mak barak mais iha mundu nee respeita Timor nia demokrasia, liberdade imprensa nee mos halo parte.
Iha rai seluk funu makaas, Timor moris hakmatek relasaun ho Indonezia sai ezemplu diak boot ba mundu.
“Hau konsidera dezenvolvimentu tinan 49 nee haksoit ba oin makaas, hau hatete deit podia diak liu tan, governu tau orsamentu 2025 ba oin tenke rezolve problema kosok oan sira hamlaha nee labele, nee mak falhansu bo’ot, falhansu iha agrikultura, falhansu iha nutrisaun saúde ba labarik sira,” katak nia.
Nia hatete, iha setor seluk susesu boot, mezmu ohin kritika makaas, setor saude laos deit tanba falta aimoruk, lae, haree ba tinan 20 mai setor saude mos diak tan, mediku lubuk ida fatin kuaze hotu-hotu iha, doutor sira halo operasaun neebe uluk sira halo iha HNGV.
“Foin daudaun hau ba hospitál Baukau, doutor lubuk ida iha neeba hau haree kondisaun hospital Baukau diak, maibe too agora seidauk rezolve problema extrin iha Baukau, mákina iha tiha ona maibe edifisiu nee la sufisiente atu tau extrin. Extrin labele tau arbiru, tenke metin loos atu extrin nee la sai nee bele provoka kankru,” hakotu nia. (eme)
Sem comentários:
Enviar um comentário