FATIN TURIZMU KONTINUA ABANDONA

Fatin turismu nu’udar setor importante, tanba bele hatama rendimentu ba kofre Estado, maibe to’o ohin loron Ministerio Turizmu no Kultura (MTK) kontinua abandona fatin turismu ne’ebe maka iha Timor Leste.

Lolos ne’e MTK promove seitor turismu nune’e bele atrai ema turista tama mai rai laran. Tantu to’o ohin loron fatin turismu barak maka iha potensia bot ba turizmu nian iha TL governu ladauk fo atensaun masimu, hanesan Metiaut, Kristo Rei, Likisa no fatin potensial turismu sira seluk iha teritoriu tomak.

“Tuir lolos ne’e tempu ona para Governu tau matan ba fatin turismu ne’ebe maka ita Timor iha, tamba ida ne’e atu hatama income ba Estadu nian mas agora ita hare MTK la promove fatin turistiku oinsa maka atu atrai ema mai ita nia rai? Ne’e susar,”Elisio Belo (estudante) UNITAL ba JN-Diario Kaurta (13/5) horseik iha.

Nia haktuir katak, MTK laiha planu ida que diak nune’e fatin turismu kuaze kontinua abandona hela.

“Ita haree katak buat sira ne’e MTK la bok, ami hanoin katak MTK laiha duni planu ida que diak ba setor ida ne’e,”Elisio komenta.

Iha parte seluk, tuir Domingos Ximenes hatutan katak, lolos ne’e Governu planea hadiak fatin turismu nune’e bele hatama reseitas ba Estado.

“Kuandu hadia fatin importante turismu iha vantazen bot wainhira ita hadiak ita nia turizmu tamba fatin turizmu barak maka sai potensialidade ba turizmu,”dehan nia.

Iha parte seluk Dulce P. Amaral hatutan, ministeriu kompetenti presiza promove fatin turistiku sira ne’ebe maka sei kontinua abandona, maibe persiza mos kria fatin turismu animal nian.

“Ita nia osan ne’e laos deit mai husi mina rai, entaun ita bele hadia ita nia fatin turista sira ne’e hotu tanba nia vantajen bot ba ita, tanba wainhira ema atu ba fatin ne’eba selu maka tama. Maibe mos persiza harii mos fatin turista nian hodi hakiak animal ne’ebe maka ita identifika diak no furak ema atu haree ne’e para ema mos iha hakarak ba vizita mos fatin sira ne’e selu,”koalia nia. alf

Jornal Nacional