INVESTIMENTU BA ESTRADA, MISAUN IMPOSIVEL

Deputadu Francisco Branco husi bankada FRETILIN hatete katak, investimentu Governu nian ba estrada iha Timor Laran tomak, hanesan misaun imposivel ida, tanba durante tinan barak problema ida ne’e susar atu rezolve.

Francisco Branco mós hatete katak, nia kestiona maka’as kona-ba Governu nia investementu kona-ba estrada, tanba estrada sira ne’e, kuaze atu sobu hotu ona, maibé kontinua sai preokupasaun iha públiku.

Francisco Branco fó ezemplu katak, hanesan estrada Fleixa atu ba Same nian, Governu presiza haree didiak, tanba estrada ida ne’e kontinua a’at nafatin.

“Ha’u hanoin seidauk iha estudu ida, kona-ba estrutura rai ninian, hau hanoin ida ne’e investimentu ida ne’ebé ita halo, nem rezultadu ida pozitiva ba ita. Ita gasta miloens ba miloens dolares, maibé laiha rezultadu ida. ida ne’e ita hare katak, estrada ne’e hanesan misaun imposivel ida ba Governu atu halo,” Francisco Branco hato’o nia kritika, bainhira partisipa iha enkontru Governu kona-ba define prioridade nasional ba tinan 2016, ne’ebé hala’o iha Ministeriu Negosiu Estranjeiru i Koperasaun Kinta (14/5).

Tanba, Francisco Branco dehan, estrada ida ne’e, husi leten komesa naksobu dadauk ona, no husi karaik, nakfera ba bebeik. Entaun Branco dehan, ida ne’e maske Governu halo esforsu tomak atu halo investementu kona-ba estrada, maibé sei laiha rezultadu.

Tanba ne’e, Branco husu ba Primeiru Ministru Rui Araújo atu kumpri nia liafuan katak, tenki investe ho kualidade, efikas no efikasia. Tanba ne’e, Branco dehan, kuandu Governu hakarka investe ho kualidade, tenki estuda uluk kualidade rai ninian, maka foin hasai konkluzaun.

“Tuir ami nia hanoin, ida ne’e projetu imposivel ida ne’ebé ita estraga osan barak, maibé laiha rezultadu ida,” katak Branco.

Hatan ba preokupasaun Francisco Branco nian ne’e, Ministru Planeiamentu Investementu Estratejiku, Kay Rala Xanana Gusmão hatete katak, asuntu ne’e diak tebes ba Governu atu preparaan hodi hasai prioridades ne’ebé los.

Xanana dehan, asuntu estrada ne’e, Parlamentu ho Governu kuñese malu desde kintu Governu ionstitusional, maibé se lori nafatin mai to’o iha sestu Governu ida ne’e.

Xanana hatutan, enkontru jornada orsamental ne’e, atu Parlamentu kompriende, bainhira Governu aprezenta orsamentu Estadu, Parlamentu hatene ona katak, tanbasa maka Governu fó prioridades ba setor hirak ne’e.

“Ida ne’e hanesan estatistika dezempeñu ida, tuir programa ida uluk nian ne’e, atu bolu atensaun ba ami, prioridades nasionais ne’e, nia rezultadu bele sai diak,”relata Xanana.

Eis Primeiru Ministru Kintru Governu ne’e dehan, kuandu Estadu Timor Leste la atrai investementu estranjeiru, ho Timor Leste nia setor privadu rasik, preokupasaun Parlamentu nian ne’e, sei mantein nafatin.

Alende ne’e, Ministru Obras Publikas Transporte i Komunikasaun, Gastão Sousa mós hatete katak, Primeiru Ministru Rui Maria de Araújo fó ona orientasaun ba sira atu fó prioridade ba kualidade de obras.

“Ami sei fó atensaun kona-ba ida ne’e, li-liu endetaillu kona-ba projetus sira ne’e, no ami sei rezolve kona-ba kestaun estrada husi Aitutu ba Same,”promete Gastão.

Tanba Gastão hatutan, kestaun ida ne’e laos ba empreja ne’ebé halo servisu deit, maibé ba povu ne’ebé la’o ba mai hodi buka nia moris lor-loron.tap

Jornal Nacional