ME SEI LOKE BIBLIOTEKA NASIONÁL

Ministériu Edukasaun (ME) sei loke bilbioteka nasionál no mós sei alarga iha munisípiu 13 atu nune’e estudante sira bele asesu ba livrus hodi estuda no halo peskiza.

“Ministériu Edukasaun nia planu mak atu loke biblioteka nasionál no iha munisípiu 13, atu nune’e estudante sira bele asesu lalais livru hodi estuda ba siênsia saida de’it mak sira hakarak estuda”, informa Ministru Estadu Koordenador Asuntu Sosiál no Ministru Edukasaun Fernando ‘Lasama’ de Araújo, ba Jornalista sira iha salaun Canossa Has Laran Dili, Kinta (28/5).

Lasama hatutan katak, konaba kestaun ne’e nia parte iha semana kotuk hasoru malu ona ho Primeiru Ministru (PM) Rui Maria de Araújo ho membru Governu no membru Parlamentu Nasionál (PN) hodi planu ba 2016 nian hodi afirma iha reuniaun katak, iha 2016 sei aumenta ka hasa’e orsamentu ba Ministeriu Edukasaun nian.

Lasama dehan, wanhira aumenta orsamentu ministériu mós tenki aprezenta planu ida ne’ebé di’ak no klaru.

“Ha’u nu’udar Ministru Edukasaun (ME) ha’u mak tenki responsabilidade, maibé ha’u husu ba reitores universidade hotu-hotu no ba padre no madre sira ne’ebé mak kaer eskola ka instituisaun sira ne’e ita hotu-hotu tenki sente no responsabilidade ba ita hotu ninia”, hateten Lasama.

Lasama salient katak, sei hamutuk ho profesores, reitores universidade no ema hotu-hotu hodi tau matan ba problema edukasaun iha Timor Leste (TL) hodi hadi’a kualidade iha futuru.

“Tamba labarik sira ne’ebé mak agora dadauk iha banku pré-eskolar sira mak sei sai futuru ba nasaun ida ne’e”, Lasama fundamenta.alm

Jornal Nacional