Governu timoroan hakotu operasaun Hanita, nebe hahú iha fulan-Marsu

Iha loron-kuarta ne'e governu timoroan desidi hakotu operasaun Hanita, nebe hahú iha fulan-Marsu hodi buka eis-guerilleiru Mauk Moruk ho nia apoiante sira, nebe envolve efetivu atus resin hosi forsa defeza no polísia.

Desizaun ne'e foti hafoin Mauk Moruk ho nia apoiante na'in rua mate iha tiruteiu ida ho forsa seguransa sira nian no loron rua hafoin hakohi tiha nia, iha rejiaun Laga, súl Baucau nian.

"Hafoin desizaun ikus asaun nian iha loron 8 fulan-Agostu 2015, Governu desidi ona hakotu operasaun hamutuk nebe harii iha fulan-Marsu 2015", refere iha komunikadu ida Governu nian, nebe esplika katak ne'e hanesan desizaun ida hosi reuniaun estraordináriu ida hosi Konsellu Ministru sira nian iha loron-kuarta.

Iha rezolusaun ida loron 11 fulan-Marsu, Governu harii tiha ona "grupu operasionál ida intervensaun hamutuk nian hosi forsa defeza no forsa sira seguransa nian, hodi hatán lalais no efisiente hodi previni hahalok todan sira perturbasaun orden públiku nian, nebe halo hosi grupu organizadu sira".

To'o agora, Governu laiha balansu ruma kona-bá folin totál hosi operasaun no balansu ikus operasaun nian.

Iha komunikadu, Prezidénsia Repúblika hatete iha semana liubá katak, aleinde eis-guerilleiru, mate mós iha konfrontu ho forsa seguransa timoroan sira nian elementu na'in tolu hosi Conselho da Revolução Maubere (CRM) - nebe lidera hosi Mauk Moruk - no ema sívil na'in rua, halo kanek efetivu na'in sia hosi forsa defeza (F-FDLT) no hosi polísia nasionál (PNTL).

Komandante forsa defeza Timor-Leste nian (F-FDTL), major jenerál Lere Anan Timur, hatete katak autoridade timoroan sira tenta to'o momentu ikus atu nia bele entrega aan.

Tuir Lere Anan Timur, antes hahú tiruteiu, nebe halo eis-guerilleiru no nia apoiante na'in rua mate, Komando Operasaun Hamutuk (COC) haruka Falur Rate Laek, veteranu ida F-FDTL nian, hodi tenta liuhosi Ângela Freitas, Mauk Moruk nia porta-vós, hetan solusaun ida liuhosi diálogu.

"Nia tenta konvense Mauk Moruk hodi entrega aan maibé laiha rezultadu hosi tentativa sira ne'e", nia afirma.

"Forsa sira halo esforsu oioin hodi tenta halo negósiu ho Mauk Moruk, nebe la simu pedidu sira ne'e no nia hatán ho tiru. Hasoru atake hosi Mauk Moruk ne'e, forsa sira halo kontra-atake no nune'e maka nia ho membru na'in rua nebe akompaña nia mate, no ida seluk hetan kanek", nia hatete.

SAPO TL ho Lusa - Foto nebe hasai iha Fevereiru 2013 durante komemorasaun tinan 12 ba kriasaun FALINTIL - Forsa Defeza Timor-Leste nian. EPA António Amaral