Xanana Abut ba Polítika Rekonsiliasaun no Páz

Prezidenti Repúblika, Jenerál Taur Matan Ruak hateten líder rezisténsia Kay-Rala Xanana Gusmão ninia vizaun antes no depois independénsia sai abut ba polítika rekonsiliasaun, páz no estabilidade ne’ebé nasaun ne’e simu hodi implementa no determinasaun boot ho fuan nakloke.

 “Atu komemora aniversáriu FALINTIL ba dala 40 nian, loron ne’ebé ho simbolízmu másimu tebes ita presta omenajen ba líder másimu rezisténsia no fundadór TL independente nian, Kay-Rala Xanana Gusmão liu-hosi atribuisaun Medalla Órden Gerilia. Lideransa Kay-Rala Xanana Gusmão nian fó konfiansa no esperansa, apoiu no respeitu tomak hosi timoroan,” Taur hato’o kestaun ne’e liu-hosi nia deskursu ba seremónia komemorasaun Forsas Armadas Libertasaun Nasionál Timor-Leste (FALINTIL) ba dala 40 iha Tasi-Tolu, Díli, Kinta (20/08/2015).

Iha oportunidade ne’e, Jenerál Taur Matan Ruak kondekora Kay-Rala Xanana Gusmão ho  medalla Léfiku Órden Gerilia tuir dekretu lei Nú. 53/2015/ 08 Jullu 2015. Baze legál kriasaun Órden Onorífika Gerilia maka artigu 29o lei Nú. 3/ 2006/ 12 Abril ne’ebé alterada ba Nú. 09/2009/29 Jullu no ba lei Lei Nú. 02/2011/23 Marsu.

Kondekora medalla refere ba Xanana tanba Xanana nu’udar líder  ida inesidível lideransa iha luta ba libertasaun nasionál ka líder másimu FALINTIL iha tempu rezisténsia. Taur Matan Ruak esklarese katak nasaun ida ne’e fó onra dadauk ba kontribuisaun no sakrifísiu veteranu sira nian. Tanba ne’e, nia husu ba hotu-hotu tenki serbisu maka’as liu-tan atu fó rekoñesementu ho loos no momoos.

“Dala ida tan, ha’u apelu ba veteranus no antigu kombatente sira atu kontinua fó imi nia kontribuisaun atu ajuda klarifika situasaun sira ne’ebé ema kontinua tau iha dúvidas. Parake, ita nia governu sei rezolve kazu sira hanesan ne’e ho neineik no beibeik to’o hotu,” nia dehan.

Nia preukupa tebes prosesu sira ne’ebé maka seidauk hetan nian solusaun.  “Ita tenki hakat liu difikuldade sira ne’ebé maka iha no mós atu rezolve ho justisa no rigor,” Xefi Estadu informa.

Taur haktuir,  FALINTIL no rezistente sempre defende diálogu atu hetan páz no seguransa iha ita nia rai no povu. Agora, nia informa, F-FDTL serbisu maka’as hodi hametin páz no konsolida estabilidade iha nasaun nurak ida ne’e. (Ekipa Matadalan)

Matadalan