Koreia Norte ameasa atu fó resposta militár forte kontra Koreia Súl

Koreia Norte ameasa iha loron-sesta ne’e, liuhosi nia reprezentante iha ONU atu fó "resposta militár" forte kontra Koreia Súl, karik nasaun ne’e kontinua fó mensajen propaganda. 

"Karik Koreia Súl la hatan ba ami-nia ultimatu, ami-nia resposta militár sai inevitável no reasaun sei forte tebes", hatete ba jornalista sira adjuntu reprezentante permanente Koreia Norte nian iha ONU, Na Myong Hun.

Iha loron-kinta, líder Koreia Norte nian, Kim Jong-Un, fó orden ba nia tropa sira na fronteira atu iha estadu alerta.

Koreia Norte halo ultimatu ida ba Koreia Súl hodi fó oras 48 atu hasai altifalante sira ne’ebé koloka iha fronteira hodi tranzmiti mensajen propaganda ka hasoru asaun militár.

Ultimatu hotu iha sábadu tuku 17:00.

Ministériu Defeza Koreia Súl nian rejeita ameasa no hatete katak sei kontinua ho emisaun.

Iha loron-kinta ne’e, Koreia Súl tiru kontra Koreia Norte, hodi hatan ba posível atake ho hosi parte Pyongyang.

Nasaun rua ne’e hasoru hikas momentu tensaun, hafoin, iha inísiu fulan ne’e, soldadu sul-koreanu rua kanek todan iha esplozaun minas ne’ebé koloka iha zona súl fronteira koreana.

Hafoin investigasaun, Seul konklui katak minas koloka hosi militár norte-koreanu sira, infiltradu iha teritóriu súl-koreanu, maibé Pyongyang nega implikasaun iha kazu ne’e.

Iha loron-segunda, soldadu súl-koreanu rihun 50 no norte-amerikanu rihun tolu hahú hala’o manobra militár ho eskala boot, ne’ebé simula atake hosi Koreia Norte.

Pyongyang klasifika ezersísiu ne’ebé sei hala’o to’o 28 agostu, hanesan "deklarasaun funu".

Norte no Súl teknikamente kontinua iha funu, hahú kedas hosi Funu iha Koreia termina ho asinatura armistísiu ida ne’ebé nunka troka ho dame entre viziñu rua ne’e.

SAPO TL ho Lusa