GOVERNU DISKUTE NARAN ESTRADA

DILI - Governu liu-hosi reuniaun Konsellu Ministru (KM) hahú deskuti naran estrada iha sidade Dili.

“Ami hahú diskute onalista kona-ba atu naran ba estrada sira iha Dili laran tomak, maibé sei adiadu, sei ba halo preparasaun di’ak liu tan mak foin aprezenta fali”, Sekretáriu Estadu Konsellu Ministru, Avelino Maria Coelho ba jornalista sira iha Palásiu Governu, Tersa (21/9).

Lista naran ba dalan sira iha sidade Dili aprezenta hosi Ministériu Administrasaun Estatal (MAE) mak hanesan saudozu Francisco Xavier do Amaral, saudozu Don Alberto Ricardo da Silva, saudozu Fernando La-Sama de Araújo inklui heroi sira ne’ebé mate ba funu ne’e. Maibé KM seidauk aprova, tanba sei kontinua deskuti iha semana oin.

Aliende ne’e, KM mós aprova rezolusaun ida hodi nomeia membru diresaun ba Arkivu Muzeum Rejistensia nian hodi define konsellu administrasaun iha muzeum.

Parte seluk, Ministériu Finansas (MF) mós aprezenta programa dezenvolvimentu sustentável ba KM no hetan ona aprovasaun. KM mós halo aprovasaun ba planu reforma fiskal ne’ebé lidera hosi Komisaria Fernanda Borges.

Portantu, Ministériu Saúde mós aprezenta lei kona-ba tabaku, maibé seidauk aprova, tanba presiza halo preparasaun ne’ebé kle’an.

KM mós aprova ona estatutu ba Hospital Nasionál Guido Valadares (HNGV), nune’e sai hanesan baze ba legal ba futuru.

Entretantu, Ministériu Negósiu Estranjeiru no Kooperasaun (MNEK) aprezenta kuadrus Organizasaun Nasoens Unidas (ONU) ba asistensia dezenvolvimentu dokumentus kona-ba programa planu asaun ba Timor-Leste nian.

Kuadrus hirak ne’e refere liu ba parseru dezenvolvimentu sira hanesan UNICEF, UNDP inklui UNFPA hetan  ona aprovasaun hosi KM. Nune’e MNEK bele haree oinsá mak atu halo servisu sira ne’e.(vas)

Timor Post